Aizawl:  India Hnampa Mahatma Gandhi piancham 152-naah amah hriatreng nan leh zahna lantir nan India rama state dangte rualin nimin zing dar 7:30 khan Chief Minister Zoramthanga leh sorkar hotu pawimawh dang ten Pu Gandhi-a lim, Zodin Square, MG Road-ah zahna pangpar an dah.

Chief Minister Zoramthanga in hma hruaiin zahna pangpar a dah hmasa ber a. Deputy Chief Minister Tawnluia leh Speaker Lalrinliana Sailo ten an dah leh hnuah Minister te, MLA te leh sawrkar hnathawk ten zahna pangpar an dah chhunzawm a ni.

Tukina Gandhi lim bula zahna pangpar dah tute zingah hian Home Minister Lalchamliana, C.Lalrinsanga, Agriculture Minister, Dy Speaker Er Lalrinawma, Lalchhandama Ralte, School Education Minister, K. Beichhua, Social Welfare Minister, L. Thangmawia, MLA leh H. Lalzirliana, MLA te an tel a. Chief Secretary  Lalnunmawia Chuaungo, Addl CS JC Ramthanga leh DGP Pu SBK Singh te bakah sawrkar hotulu te an tel bawk a ni.

Gandhi piancham hi India Sorkar-in ram pum chawlh (National Holiday) atan a a puan zinga mi a ni a. Kum 2007 khan United Nations General Assembly chuan October ni 2 hi ‘International Day of Non-Violence’-ah a puang nghe nghe a ni.