Kum 22 mi Mahsa Amini thihna avanga Iran-a buaina chhuak chuan zual lam a pan zel a, mi 76 zetin nunna an chan tawh. Buaina hian khawpui khawpui 80 a tuam tawh a, khawvel hmun hrang hrang atangin Mahsa Amini thlawpna lantirtu an pung zel bawk. 

Mahsa Amini hian September 13 khan an ram khawpui Tehran a tlawh a, hemi tum hian morality police officer te chuan an lo man. Iran-ah hian hmeichhiate chu pawn an chhuah dawn chuan an lu an tuam tur a ni a, an sam a lang tur a ni lo - hei hi Mahsa Amini hian a zawm lo niin police te chuan an sawi. 

Mahsa Amini hi police ten an kawl laiin a thi zui a, hei vang hian mipui an lungawi lo a buaina a chhuak ta a ni. September 18 khan vui liam a ni a, heta tang hian buaina hi a punlun chho. Khawpui 80 velah buaina hi a chhuak a, police ten silai leh hmanraw dang hmangin lungawi lohna lantirtute hi an bei let.

Mi 76 an thih tawh bakah, mi thahnem tak man an ni tawh a, an man zingah hian journalist pawh eng emaw zat an awm a ni. Iran President Ebrahim Raisi chuan buaina chawkchhuaktute hi a dem thu leh an chungah na takah an chet tur thu a sawi. 

Hetih lai hian Mahsa Amini thlawptu an pung zel a, Turkish singer Melek Mosso chuan stage-ah a thlawpna lantirin a sam a tan. Hetiang bawk hian Canada hmeichhe pakhat pawhin vantlang punkhawmna hmunah Iran ID chu a chepchhia a ni.