Utah, United States-a nupa chu feet 2 leh inches 9.44 zeta insan hleihin khawvela nupa insan hleih ber niin Guinness World Records-ah ziah luh an ni.

An pa zawk, Christie Chandler-a chu 5 feet, 11.74 inches zeta sang a nih laiin a nupui, Senecca Corsetti-i ve thung chu 3 feet, 2.29 inches chauh a ni ve thung a. Guinness World Record chelhtute chu khumin khawvela nupa (neih inang leh nupa pangngai emaw pawh) zinga insan hleih ber an ni thar.

Corsetti-i hi rualbanlohna chi khat, diastrophic dysplasia an tih vanga a ruh leh tisa dang thang thei lo a ni.

Chandler-a chuan a nupui hian nupa insan hleih record chungchang a chhiar fuh atangin record siam tura inziah luh chu a phur hle niin a sawi.

An nupa hi sikul khata zirtir hna an thawh dun laia intawng an ni a, June, 2021 khan an innei a. Nupa insan hleih ber world-record an siam tuma thil an an buaipui chu fiamthu nan a tirah chuan an hmang a, a tawpa record an siam ta chuan a barakhaih hle niin an sawi.

An insan hleih lutuk chu a that lohna aiin a thatna a tam zawk niin an sawi a. “Keiin a hniam lai ka tifai a, ani hian a sang chin zawng a tifai mai thin,” tiin Corsetti-i chuan inchhunga an awm dan a sawi.

Guinness World Record-a an hming a chuang chuan mi dangte pawh inhmeh lo leh inmil lo tak taka an lo awm a nih pawhin an tan chona siamtu a nih an beisei tih an sawi.