Pakistan Railways Minister Azam Khan Swati chuan rel khalhtu leh a thachhangdawltu chu passenger phura an zinnaah ei tur chi khat, yoghurt leia Kahna railway station bula an dinpui avangin an hna atangin a chawlh lailawktir.

Social media-a he thil thleng video thehdarh a ni a, a lan dan chuan rel khalhtu hian rel tidingin an dinna bula dawrah yoghurt a lei lai a lang a. A darh chiam hnuah minister hian hremna a pe ta a ni.

Video clip a darh hnuah hian railways department chuan sawisel a hlawh zual phah hle a, he thil thleng bakah chetsualna thleng thin te, passenger-te himna leh a chuan man chungchangah te sawiselna thawm a tihrin phah hle a ni.

Minister hian Pakistan Railways Lahore thuneitute bepawp vatin driver Rana Mohammad Shehzad leh a assistant Iftikhar Hussain chu an suspend ta nghal a ni.

"Hetiang thil hi ka enliam mai mai dawn lo va, hun lo kal zel turah pawh mahni tana kan ram thil lo hmang chu hrem zel an ni ang,” tiin thu a chhuah zui.

December khan Pakistan Railways hian rel khalhtu leh a puitute chu hna an thawh laia mobile phone hman a lo khap tawh.

Mihring leh bungraw phur rel an khalh laia in-selfie, video-a thla lak leh audio message thawn pawh phal loh a ni a. Division tina hotute chu he thupek kengkawh tur leh palzut hrem tura hriattir vek an ni.