South Korean mihring maktaduai tel chu Nilaini mai atang khan an naupang thut a, thenkhat phei chu kum hnih laiin an naupang sawt hlawm.

Asia khawmualpuia ram changkang tak hian kum chhiar dan bik an nei a, chu chu Nilaini khan paihin khawvelin kum a chhiar dan an zawm ve ta a, hei vang hian a rualin an naupang thar ta thut hlawm a ni.

An lo kalpui thin danah chuan nausen piang hlim hlawl hi ‘kum khat’ an ti nghal a, nu pum chhunga a awm lai kha an chhiar vek thin.

Hei bakah hian ‘Korean age system’-ah hian kum an chhiar dan danglam a la awm a, ram dangten pianchama kum an chhiar pun chauh thin ang zawm lovin January 1-a kum a thar chiah hian kum an belh zel thin.

Heti a nih avang hian kum hlui thlah nia piang chu a pian hlima kum khat an tih bawk avang leh a tuka kum a thar zui bawk si avangin ni khat chauha upa pawh kum hnih a ni nghal der zel tihna a ni.

Nilaini atanga an tih dan hlui an thlak turah hian a vaiin thlak dawn lo mah se nau piang hlim khat khat an tih ngawt chu an paih tawh dawn a, kum bi chhiar nan erawh January 1 an hmang zui ang.

Hetih a nih tak avang hian kum hlui thlah nia piang chu a tukah kum khat an ni dawn tihna a la ni tho.

Eng pawh chu ni ta se, nau piang hlim kum an tlintir nghal ngawt ang a awm tawh dawn loh avangin South Korean dam lai zawng zawngte chuan a lo berah kum khat theuh tal paihin an naupang thar ta sawt dawn tihna a ni tho tho ta a ni.