Manipur buaina kal zelah Minister L Susindro-a kudam chu mipui inhawr khawmin an halsak. Susindro-a kudam hi Chingarel, Imphal East district-a mi niin a kang ral vek niin police chuan Inrinni khan an sawi.

Consumer & food affairs minister hi a chenna in, Khurai-a mi pawh hal tumin Zirtawpni vek khan beih a ni a; mahse, venhim hna thawktuten an dang hman thung.

Khurai-ah hian venhim hna thawktute hian mipui hnawh darh nan silai an hmet puak a, mittui tlakna an phuh bawk a, zanlai thleng hetiang hian an bei niin police chuan an sawi.

Thil thlengah hian mihring thi leh hliam erawh an awm lo.

Woman Minister Nemcha Kipgen-i sorkar ina a chenna, Lamphel, Imphal West district-a mi pawh mi tu tih hriat lohten June 14 khan an hal tawh a. Union Minister RK Ranjan Singh-a in pawh beih niin hal tumin an lo bei viau tawh bawk.

Zirtawpni zanah pawh khan Yaingangpokpi (YKPI), Imphal East district-ah pawh mi tu tih rhiat lohten silai an hmet puak chiam a, sipai tirh luh belh niin a hmet puaktute hi an an um darh tawh a. Hetih lai hian mipui pun khawmna a awm a, hei pawh hi zawi zawia thunun mek zel a ni tih thuneitute chuan an sawi bawk.

Manipur-ah hian chi leh chi inkara buaina chhuak mekah mi 100 chuangin nunna an chân tawh a, chenna in tam tak hal chhiat tawh niin mi tam tak chenna nei lovin an awm mek.

May 3 khan Metei-ten Scheduled Tribe (ST) status neih an tumna duh loh lantir nan tribal-ten tlangram district-ah ‘Tribal Solidarity March’ an huaihawt a, heta tang hian hnam hnih inkarah hian tharum thawhna a thleng zui a, sipai tirh luh belh niin buaina zualpui hmeh mih ni tawh mah se thla khat hnuah pawh a la reh fel thei lo.

Nimin khan Union Home Minister Amit Shah chuan Manipur chungchangah hian all-party meet a ko va, sawiho a ni.