Manipur police-te chuan mi sual tu tih hriat lohten Ningani tlaia Punjab National Bank (PNB) Ukhrul Branch an rawk chu ngawrh takin an chhui zui mek zel a, police bakah venhim hna thawktu dangten hmarchhak state-a bank rawkna lian bera a bultumtute man ngei tumin an bei mek.

Manipur police hian, “November 30, 2023-a ralthuam kengten Punjab National Bank, Ukhrul an rawk chu Manipur Police leh venhim hna thawktu dangten umzuiin a titute man chhuah ngei tumin an bei,” tiin X-ah an tar lang.

Police hian ‘naka’ leh checkpoint zawng zawngah inralrinna dar an khawng tih an sawi a, state police thuneitu sang, Inspector General of Police (IGP) leh Deputy Inspector General of Police (DIGP) rank chenin a chhuinaah hian beiin chhun en laia bank rawkna hi a titute man chhuah ngei an tum tih an sawi.  

“Naka leh checkpoint-ah inrin vek a ni a. IGP leh DIGP ten chhuina leh beihpui thlaknaah hian an ho a ni,” tiin X-ah hian an tar lang a ni.

Ningani tlai dar 5.40 vel khan ralthuam nena inthuam mi pariat atanga 10 vel inkar chuan Ukhrul lailia awm, PNB Ukhrul Branch hi an luhchilh a, Rs Vaibelchhe 18.85 zet an ru chhuak.

Police-in an sawi dan chuan bank hi a inkhar a hun tawh a, thawktute pawh haw darh tan tawhin luhna pui ber (main entrance) khar tawh a ni a. Hetih lai hian a rawktute hian bank hnung lam atanga luhna atanga lutin thawktu la awm leh vengtu zawng zawng nen an vau bet a, an duhtawk pawisa la chhuakin an tlan bo zui ta a ni.

Bank rawk a ni tih an hriat veleh Ukhrul Superintendent of Police (SP) Ningsen Vashum-a hovin police an thleng nghal a, heta tang hian a chhui hna hi an la thawk zui mek zel a ni.

Bank chhunga CCTV camera an dah atanga a lan dan chuan rawktute hi sipai thawmhnaw (camouflage) an inbel vek a, ralthuam pawh tha tak tak an keng a, heng zingah hian AK series assault rifle-te pawh a tel tih a lang thei.  

A hnu lawkah Manipur police hian mi tu tih hriat lohten PNB Ukhrul Branch an rawk thu leh venhim hna thawktuten a titute man tuma theihtawp an chhuah nghal thu X-ah an tar lang nghal a ni.