Chi leh chi inkara buaina leh tharum thawhnain thla thum dawn a tuam hnuah Manipur-a sakhaw hrang hrangte chuan Interfaith Forum for Peace & Harmony (IFPH) tia invuahin Pathianni khan Imphal khawpuiah an muanna a awm leh theih nan chaw ngheiin an tawngtai rual.

Lainingthou Sanamahi Temple, Hayingkongbal, 1st MR Gate-a hun hmanah hian chi leh chi inkara buaina chu a reha chhuan lo awm zel turte tana an inkara inunauna a awm leh theih nan an rinna theuh hmangin an tawngtai a ni.

Chaw ngheia tawngtainaah hian buaina chhuak meka nunaute tawrhna nasa tak thleng chu tihtawpa a awm theih nan an dil bawk. 

He hunah hian All Manipur Buddhists Association, All Manipur Christian Organisation, Bhakti Seva Lup/Ekta Parishad, Brahmakumari Manipur, Catholic Diocese, Divine Life Society, Federation of Madrasahs, International Society of Manipuri Gaudiya Vaishnavas, ISKCON, Jain Samaj, Jamat-e-Islami Hind, Lainingthou Sanamahi Temple Board, Mahatma Seva Asram, Manipur Baptist Convention, Meitel Christian Churches Council, Manipur Cultural Integration Conference, Naga Christian Forum Manipur, Rongmel Naga Baptist Association, and Tinkao Ragwang Chapriak Phom (Assam-Manipur-Nagaland) te an tel a ni.

Zing dar 9:00 atanga tlai dar 5:00 thlenga hun hmanah hian sakhaw hruaituten an sakhaw bu theuh behchhana thu sawiin, an rinnaah hmeichhia leh naupangte chunga that chhuah tura inzirtirna tar lan a nih dante an aupui hlawm. 

Sakhaw hrang hrang hruaitute hian pawikhawihna rapthlak tak takte a thlen tawh lohna tura tan leh thawhho dan turte pawh an sawiho bawk.

IFPH Convenor Deben Bachaspatimayum chuan an forum hian buaina a chhuah tirh atang tawh khan hetianga hmalak hi an duh tawh tih a sawi a. June 5 khan forum hi an din ta a, an tum ber chu chi leh chi inkara buaina hmehmih leh nakin zelah pawh an karah muanna leh inunauna a awm theih nana hmalak a nih thu a sawi.

He huna tel, All Naga Christian Forum Vice-president Pastor Johnny Shimray chuan tharum thawhna thleng tawrhna nasa tak a thleng chu pawi a ti tak zet tih a sawi a. Sorkar pawh Manipur-a chengte tan chak zawka hma lain muanna a awm theih nan bei lehzual turin a duh tih a sawi.

Manipur-ah hian phaizawla cheng, he state-a hnam tam ber, Meitei-ten scheduled tribe-a telh an phutna duh lohna lantir nan May 3 khan tlangrama cheng tribal-te chuan a huhovin kawng zawh lian tham tak an huaihawt a. Heta tang hian hnam hnih inkarah hian buaina lian tak a chhuak zui ta a ni.

Tun thlengin mi 130 vel thi an awm tawh a; chenna in, sakhaw hmun leh vantlang thil tam tak tihchhiat a ni a. Mi sing telin himna zawngin an in leh lo an chhuahsan tawh a ni.