May 3 atanga chi leh chi inkara Manipur-a buaina chhuak tuar na ber pakhat, Churachandpur district-ah Nilaini khan mi 87 thahte ruang chu a ruala phum a ni ta.

Vuina inkhawm hi venhimna khauh tak hnuaiah kalpui a ni a, Pathianni zana tribal hnam hnih intihbuaina chhuak avangin Section 144 puan a la ni bawk.

Thi mi 87 vui takte hi Kuki Zo vek an ni a, thla riat dawn mitthi dahna ina dah reng an nih hnuah vui an ni ta a. Vui theih mai an nih loh avang hian boruak pawh a sosan phah hle nghe nghe.

Buaina chhuahna hmunpui ber pakhat, Churachandpur-ah hian a hnu lam thlengin boruak a tang hle a. Kuki-te hian thla eng emaw zat liam taah khan Churachandpur leh Meitei chen tamna district, Bishnupur inrinaa a ruala vui an tum a, hei hian boruak a titang zual hle a ni.

Thla eng emaw zat liam hnua, vantlang huap pawlte indawra Supreme Court hial pawh a inrawlh hnuah thite chu an chenna in ngeiah vui turin a ti ta a ni. 

Thawhtanniah pawh khan Churachandpur district-a Thingkangphai hmun hrang hrangah tharum thawhna a thleng leh bawk.

“Pawl hnihte inkara inrem lohna avangin muanna awm mek tihchhiat theihna remchang a la tam hle a, boruak a la tang hle,” tiin district magistrate chuan punkhawm khapna a tihchhuahah a tar lang.

He khapna hi February 18, 2024 thleng la kalpui tura tih a ni.

Hmarchhak state-ah hian Meitei-ten Scheduled Tribe (ST) status neih an phutna avangin buaina a chhuak a, Kuki nen an intihbuai a. Tharum thawhna thlengah mi tam tak thi tawhin sang tel baihvaiin an awm phah.