India hmarchhak, Manipur-a mipa rualin ruaka hmeichhe pahnih kawng an zawhpui lai video darh thu kal zelah he state police-in dem a hlawh thar hle.

Video-a lang hi May 4 daih tawha thleng kha niin Nilaini khan a darh chauh va, khawvel pumah sawi a hlawh.

Ningani khan police chuan pawngsual rawn thubuai ziak lutin mipa pali an man nghal a, mi dang pawh man belh an inring.

Video a darh rualin police hi che chhuak nghal mah se an hnehah hian thil a thlen hnu lawkah complaint a lut tih hriat a ni a, video-a mipa langte an chiang bawk si lo va, an che tlai chu sawi a hlawh ta hle a ni.

Police hnena thu thlentu hi hmeichhe pahnih langa pakhat zawk chhungte zinga mi a ni a, police thuhnuaia an awm lai mipa rual hian an chhuhsak niin a ziak a. Hmeichhiate hian an chunga duhtawka mipaho an chet lai hian an bulah police an awm reng nia sawiin, ‘min pui turin an che eih lo’ niin an sawi.

Police pawh hian hei hi an pha lo va; mahse, chanchinbu thenkhat chuan an hotu sang zawkte thu sawi nia sawi, mipa rual hian ‘an tam hneh’ tia an sawi erawh an tar lang hlawm.

Sorkar hotu sang pakhat chuan May 3-a an state-a tharum thawhna a thlen atang khan complaint  6,000 chuang an dawng tawh a, ‘Manipur police an tam tawk loh’ avangin thenkhat chu tihkhawtlai a ni tih BBC a hrilh a. Sorkar chuan video chu hmu hma sela chuan rang taka a titua puh an man nghal tho tur thu a sawi bawk.

BBC hian Manipur police hi phone-a biakpawh a tum a; mahse, an chhang lo.

Complaint thehluhah hian hmeichhe pahnih, kum 21 leh 42 mi hi mi dangte nen, an vaiin mi panga, pitar leh mipa pahnih, nula naupang zawk nuta leh a pa nen an zin laia an tawn a nih thu tar lan a ni.

An zin chhan hi Myanmar nena inrinaa awm, an state-a chi leh chi inkara buaina chhuak tlanchhiatsan tum an ni a. Thla hnih chuang liam ta atanga buaina chhuak hi Meitei leh Kuki tribal inkara chhuak a ni a, mi 130 vel thi tawhin mi 60,000 chuangin an in leh lo an tlanchhiatsan tawh.

Video-a lang hmeichhiate hi Kuki an ni a, mipate hian Meitei an ni ve thung.

Hmeichhe pahnih chunga thil thleng hi buaina a chhuah tirh lam a ni a, an chenna khua chu mipa rual, ‘800 atanga 1,000 vel, thenkhat ralthuam kengten beia an hal vangin’ an tlanchhiatsan nia sawi a ni.

Complaint an thehluhah chuan police-in an chhanchhuak phawt a; mahse, ‘tharumin mipaho hian an hnehchhuh’ leh a, an inphelh ruahtir ta niin an tar lang.

A beitute hian an kalpui mipa pahnih chu an that a, nula kum 21 mi zawk chu ‘chhun êngah an pawngsual rawn’ nia tar lan a ni a. Hmeichhe dang pakhat, video-a lang ve lo pawh an inphelh ruahtir tho bawk niin an tar lang.

Video rapthlak takah hian hmeichhiate hian mittui leh na tuar tih hriat takin an inhup a, anmahni beitu lakah khawngaih an dil tih a lang a. Hei hi Nilaini khan nasa takin social media-ah a darh ta a ni.

Chief Justice of India DY Chandrachud pawh na taka tawng chhuakin Supreme Court chu ‘he video hian a tirilru na hle’ tih a sawi a. Sorkar hnenah pawh ‘in che lo a nih chuan kan che ang’ tiin a sawi.

Parliament rorel inkhawm pawh ni he thil vang hian ni hnih chhung rorel mumal theih lohvin a awm ta a, eptu MP-te chuan sawiho an phut a ni.

Thinrim takin mi tam tak an tawng chhuak a, sorkar chu rang taka chea a na thei ang bera a titute hremna pe turin an ti.

Prime Minister Narendra Modi pawh Manipur buaina sawi chhuak duh ngai lo ni mah se a tawng chhuak ve ta hial a. Thil thleng chuan ‘India a tizak’ tia sawiin, ‘a titute chu ngaihhnathiam an ni lo vang’ a ti bawk.

Manipur Chief Minister Biren Singh pawhin a titua puh zinga mi an man nghal thu leh hremna na ber pek a phut thu a sawi chhuak bawk.

Man nei nghal mah se mi tam tak chuan police hnena thla hnih chuang kal taa thu thlen tawhah tuna man neih chauh chu an lungawi thei chuang lo va, thuneitute chunga rinna an nghah ngam tawh loh thu an sawi hlawm.

Kuki tribal leh hmeichhe pawl hrang hrangte chuan Manipur buaina kal mekah hian hmeichhe pawngsualna leh dan bawhchhiata chetna rawng tak tak a tam thu an sawi bawk.