Manipur-a buaina kal zelah Zirtawpni zan khan Imphal khawpuiah mipui inhawr khawm leh venhim hna thawktute an innawr leh a, civil mi pahnihin hliam an tuar a. BJP hruaitu in hal tumna a awm bawk tih thuneituten an sawi.

Imphal bakah hian Kwakta, Bishnupur district leh Kangvai, Churachandpur district-ah inkahna a thleng bawk.

Imphal West district-a Iringbam police station atangin ralthuam ruk chhuah tumna a awm bawk a; mahse, engmah an la hman lo thung.

Army, Assam Rifles leh Manipur Rapid Action Force chuan state khawpuiah hian buaina chhuak tur vengin zankhuain joint march an neih a ngai hial.

Mipui pungkhawm hi mi 1,000 chuang lai an ni a, palace compound bula inte hal an tum a ni.

RAF chuan mittui tlakna leh thelrel silaimu hmangin an kap darh.

Hmun dangah mipui hian MLA Biswajeet-a in luhchilh an tum bawk a, hei pawh hi RAF-in an um darh thei hlauh bawk.

Sinjemai-ah zanlai pelh tawhah BJP pisa hual a ni bawk a, Army-in a hualtute an um darh thei bawk.

Imphal-ah hian Porampet-ah zanlai velah BJP (women’s wing) president Sharda Devi-i in chu luhchilh tum a ni bawk a. Venhim hna thawktuten an hnawt darh theih bawk.

Zirtawpni chhunah khan mipuiten Imphal lailia kawngpui dangin eng eng emaw an hal tawh bawk.

Union Minister RK Ranjan Singh-a chenna in pawh Ningani zan khan luhchilha hal a ni a. Zirtawpni khan tribal IAS officer chawl tawh in bula a kudam chu hal chhiat vek a ni bawk.

Ningani zana thil thlengah hian venhim hna thawktu leh kang \helhtuten Minister of state for External Affairs Singh-a in kang chhe tur chu an chhan hman hlauh a ni.