India-a eptu tangrual pawl, Indian National Developmental Inclusive Alliance (INDIA) MP rualin ni hnih chhung Manipur an tlawh ta a, Pathiannia Governor Anusuiya Uikey hnena memorundum an thehluhah prime minister-in tharum thawhna thleng chu ‘zak lo takin a ngai pawimawh lo’ niin an thlen.

Party hrang hrang atanga kalkhawm MP 21-te hian hmarchhaka chi leh chi inkara buaina thleng mek hi enin hmun hrang hrang an tlawh.

Pathianni tlaia an haw dawna Governor Uikey-i hnena lehkha an thehluhah hian ‘dik taka rorelna chu a kilah nawr tawm’ a nih thu leh remna leh muanna a awm leh theih nan a tul ang zawng zawng ti turin an ngen.

“Inremna leh muanna a awm theih nan a tuartute ngaihsak leh awmna pek hi a hmahmawhthlak ber a. Sorkar laipui pawh ni 89 zet Manipur-a dan leh thupek kenkawhna a buai dan hi enpui turin ti la, muanna leh nunphung pangngai hlu taka let leh a theih dan tur ngaihtuah turin ti rawh,” an ti.

Eptu aiawhte hian Churachandpur, Moirang, leh Imphal-a buaina avanga in leh lo chhuahsana relief camp-a awmte tlawhin an kawm tih an sawi bawk.

Prime Minister Narendra Modi chuan ‘Manipur buainaah hian zak miah lova a ngaih pawimawh lohna’ a tilang chiang hle tih memorandum-ah hian an tar lang a. Thla thum chhunga thil chhia hrang hrang dinhmun an tar lang bawk.

“Mi 140 chuang an thi tawh a, mi 500 chuang hliamin chenna in 5,000 chuang a kang chhe tawh a, mi 60,000 chuangin awmna mumal an nei lo bawk a. Hei hian sorkar laipui leh state sorkar hian hnam hniha mite nunna leh an thil neihte a humsak zo lo tih a tilang,” an ti.

Tun hnai ni rei vak lo thleng pawha hmun hrang hranga inkahna leh in hal a la awm chu ‘an rinphak bak’ a nih thu leh thla thum dawn liam ta chhunga boruak thunun tura hlawhchham a nihzia a lang chiang niin larsap hnena lehkha thehluhah hian ziah a ni.

Relief camp-te pawh a dinhmun a chhe hle tih an sawi a, naupangte phei chu an mamawh ang zela enkawlna bik pek a tul tak zet tih an sawi.

Eptu MP-te hian thla thum zet internet tihthih a ni ta chuan titi leng a titam a, inrin tawnna a tichhe zawk niin an sawi bawk.

Trinamool Congress aiawha Manipur tlawhtu zinga mi, Rajya Sabha MP Sushmita Dev chuan thuthar lakhawmtute an kawmnaah Manipur mipuite chuan eptute lam an tang tih a sawi a, parliament fur thutkhawm kal mekah pawh ‘prime minister-in a tawng chhuah ngei nan’ a tawp thlengin an bei dawn tih a sawi.

Congress hruaitu, Adhir Ranjan Chowdhury pawhin larsap pawh hi an inkawmnaah hian a lung a chhe hle niin a sawi. 

“Hruaitu hrang hrang, Kuki leh Meitei pawh, hnam hrang hrangte dawra chin felna tur kawng dap turin min ti a. Party tin aiawhten Manipur an tlawh a ngaih thu leh hnam hruaitute kawm turin a ti a, hei hi mipuite zingah inrinngam lohna a awm tawn vek tawh vang a ni,” a ti.

Dev-i hian a hmain May 4-a hmeichhe pahnih, saruaka khawlaia kalpuite an kawm leh a nu an hmuh thu a lo sawi tawh a. Buaina chhuaka thi a fapa leh a pasalte ruang a hmuh ngei theih nan an puih tur thu an hrilh bawk.

BJP chuan eptu MP-ten Manipur an tlawh mek lai hian Rajasthan leh West Bengal-a hmeichhiate chunga pawikhawihna thleng hmangin an lo bei mek bawk a. “I.N.D.I.A. hi Manipur atanga an lo kir leh hunah Adhir Ranjan Chowdhury-a hi an state, West Bengal-a hmeichhiate laka pawikhawihna hi tha a ti em tih ka zawt duh. I.N.D.I.A. (front) MP rualte hian Rajasthan leh West Bengal-a hmeichhiate laka chetna report pe ve rawh se,” tiin Union Minister Anurag Thakur chuan a sawi.

Chief Minister N Biren Singh-a kaihhruai Manipur sorkar chuan thla thar tirah assembly session koh a tum nia sawi a ni.