NRC an tih hi Assam-ah pawh kalpui a lo ni tawh a, hei hian a tum ber chu ram leilung fa hriat chiana a ni lote ram mi nihna atanga paihna a ni ber.

Assam-a kalpui a nih khan thlawptu thahnem hle mah se duh lotu pawh an tam a, a list an tihchhuah hnuah hming chuang ngei tura inngai tam tak chuang lo an awm zui a, hemi hnuah phei chuan beih a tawk nasa hle a ni.

Manipur Chief Minister N.Biren Singh chuan JD(U) thu put luh chu an state tana tha tur leh rorelna ina member-te pawh an inlungrual tlanna a nih thu a sawi.

Hetih lai hian pawl thenkhat chuan ram leilung fa dik takte chauh chhinchhiaha an awm theih nan leh dna lova an state-a pem lutte hriat chhuah ngei an nih theih nan an state-a an awm tan hun atana hman tur kum chu sawn hlat an duh thu an sawi nghal.

Manipur Assembly chuan private member resolution pahnih pawmin state population commission an din dawn a, National Register of Citizens (NRC) an kalpui dawn bawk.

JD(U) MLA Kh Joykishan-a’n Zirtawpnia budget session tawp nia thu a put luhte hi member-ten an pawmpui ve ve a ni.

Joykishan-a sawi dan chuan an state mipui chu kum 1971 leh 2001 inkar khan 153.3% zet leh 2001 leh 2011 inkar khan 250.9%-a an pung.

Phaizawl bikah kum 1971 leh 2001 inkar hian mihring hi 94.8%-a pungin 2001 leh 2011 inkarah 125% velin an pung niin  Joykishan chuan a sawi.

JD(U) MLA hian tuna an pun chak dan en hian Manipur pawn lam atanga a ruka luta inbengbel nghet zui ta an tam lutuk niin an sawi.

Phaizawl district atanga tlangrama pem chu thunun a ngai tih a sawi a; a bik takin tlangrama mihring puk chak lutuk chhan lian ber pakhat chu state pawn atanga lut an tam vang niin a sawi.

Manipur hi Myanmar nena inria awm an ni a, thenawm ram atang pawh hian a ruka lut an tam rin a ni.