India-a thuneitute chuan sorkar laipui hnuaia police-in tun hnaia khawvel pumin a dem rawn mipat hmeichhiatna kaihhnawiha hmeichhe pahnih khawih an ni lai video darh chu a chhui dawn tih a puang.

Union Home Minister Amit Shah chuan Central Bureau of Investigation (CBI)-in  he thubuai hi tharum thawhna thlenna hmun, Manipur-a police kut atangin an la chhawng dawn tih a sawi a ni.

Manipur-a thil thleng video-ah hian hmeichhe pahnih chu saruakin mipa rualin an hual karah khawlaiah kalpui an ni a, a kalpuitute hian nawmnah taka hrawmin an nam bawk.

He thil hi May thla tira thleng tawh kha niin kar hmasaa a video a darh hnuah chauh hriat lar a ni.

India hmarchhak, Myanmar nena an inrinaa awm, Manipur-ah hian chi leh chi inkarah buaina chhuak mekin thla thum dawn a awh tawh.

A mi cheng tam ber, Meitei leh a tlem zawk, Kuki tribal inkara buaina chhuakah hian mi 130 vel an thi tawh a, mi sang tam tak baihvaiin an awm mek.

Video-a lang hmeichhiate hi Kuki an ni a, a hualtu mipate hi Meitei an ni thung a. Thil thlen hnu lawkah complaint thehluh nghal a ni a; mahse, he thil kaihhnawihah hian video a darh tukah chauh mi man an awm a. Complaint lut reng sia video darh hnu chauhva an che chhuak hian state police demna a tam phah hle.

Police chuan he thil an chhuinaah mi pasarih an man tawh tih an sawi a. Shah chuan man zingah hian he video latu nia an puh pawh a tel tih Ningani khan thuthar lakhawmtute hnenah a hrilh.

Sorkar hian Supreme Court hnenah pawh he thubuai hi Manipur pawn lama ngaihtuah tura ngenna a thehlut bawk tih Shah hian a sawi.

Eptu hruaitute leh mihring dikna chanvo humhalhtu tam takin Prime Minister Narendra Modi-a sorkar chu Manipur buaina ngaihtuah tawk lovah an puh hlawm a. Hmarchhak state-ah hian Modi-a awmna, BJP thovin ro an rel a ni.

Modi-a hian kar hmasaa video a darh hnuah chauh khan Manipur buaina chungchang hi a la sawi chhuak a. Thil thleng chuan ram a tihzah thu leh thil sual titute chu zuah an nih loh tur thu a sawi a. Tun thlengin he state hi a la tlawh lo.

Eptu hruaitute chuan Modi-a hian parliament-ah buaina chungchang hi sawi ngei se an duh a. A sorkar rintawk lohna pawh ram rorelna inah hian an pu lut hial a, hei hi a sorkar paih thlak tumna aiin an tawngtir theihna tura an nawrna a ni.

Shah chuan sorkar chu sawiho turin ‘a inpeih reng’ a ti a, eptute zawkin sawina remchang an siamsak lo zawk niin a sawi.

Ningania thuthar lakhawmtuten an kawmnaah hian Kuki leh Meitei aiawhten vawi ruk inbiakna an neih tawh thu a sawi a, inbiaknaah hian sorkar hnathawk chawl tawh leh judge-ten palai hna an thawk tih a sawi bawk.

“Hma lam panin an kal zel a, an lungawi tlanna tura an indawr fel theih ngei a beiseiawm,” tiin Times of India chanchinbu hnenah a sawi.