russian hawtu : Russian sipaite hian Melitopol hi Ukraine an rûn ni hnihna, February 25 khan an la niin Ukrayinska Pravda news website chuan a tar lang.

Fedorov-a hian Russia-in an ram a rûn duh loh lantirna lian tham vawi tam a huaihawt zui nia sawi a ni a. March 2-a kawng zawh a huaihawtah phei chuan mi sang chuang an tel.

Ukrayinska Pravda chuan March 5 khan Fedorov hian tui leh damdawi a awm loh avangin a hrehawm hle tih a sawi tih a tar lang.

Ukrainian thuneitute chuan an ram chhimchhak lam, Melitopol mayor chu Russian sipaiten an ru bo niin an sawi a, he khawpui hi Russia-in a thunun tawh chin a ni.

Ukrainian interior ministry-a adviser Anton Heraschenko chuan sipai 10-ten Melitopol-a hmun buai lai chu Ningani khan luhchilhin Mayor Ivan Fedorov-a hi an hruai chhuak a, hmun hriat lohvah an kalpui tih a sawi.

Kyiv-a president’s office-a deputy head  Kyrylo Tymoshenko chuan Fedorov-a ruk bo lai nia sawi video a thehdarh bawk a. Video-ah hian hmai tuamten mi pakhat an hruai chhuak lai a lang a ni.

Moscow atang chuan Fedorov-a chungchanga thil thleng hi engmah sawi a la awm lo.

Zirtawpnia video message a tihchhuahah Ukrainian President Volodymyr Zelenskyy chuan inrukbona thleng a dem thu a sawi a, Fedorov-a chu ‘Ukraine ram huaisen taka chhantu mayor a ni’ tih a sawi.

“He thil thleng hi min rûntute chak lohzia tilangtu chiang tak a ni,” a ti a. “Firfiak taka chetna an kalpui thar leh mek a, Ukrainian thuneitute apiang hmeh mih an tum a ni,” a ti.

Ukrainian Foreign Ministry pawhin inruk bona thleng hi a sawi ve bawk a, war crime a tlin thu leh khawvel ram danin indonaa civil mite hetianga tih hi a khap a ni tih a sawi.

Ministry chuan Russian sipaite hi mayor lakah hian mi firfiakte angin an che niin a sawi a. “Ivan Federov leh civil mi dangte laka an chet dan hi tihtawptir vat turin ram dangte kan ngen,” a ti.