Aizawl June 2, 2024 : Nimin khan ZoCareer Mastermind Abacus buatsaihin 1st State Level Abacus & Mental Arithmetic Competition chu Govt. Hrangbana College, Golden Hall-ah buatsaih a ni.

Zirlai naupang kum sarih atanga kum 13 inkarte an thluak leh rilru chakna, thil chhut thiamna leh inrintawkna an neihna tur atana buatsaih 1st State Level Abacus & Mental Arithmetic Competition 2024 hi School Education Minister Dr. Vanlalthlana’n khuallian niin hun a hmanpui a. Mizo zirlaiten Mathematics leh Science thiamna lamah hmasawnna an mamawh thu a sawi a, National level competition hrang hrangah Mizo hnam ang pawha tan a ngaih thu a sawi bawk.

Minister chuan Mizo zirlaite kan thluak a that thu leh zir bingna thilah chuan India ram huap pawhin kan thlen san zel tur thu a sawi a. Zirlai naupangte chu dik leh ril tak chunga tun atanga ram leh hnam tana hlawhtling ngei tura zirna kalpui zel turin a chah a ni.

Program kaihruaitu, Lalhruaitluanga, Managing Director ZoCareer Solutions chuan Abacus Mastermind-in a tum ber chu zirlai naupangten mahni inrintawkna an neih theihna turte, thluak leh rilru chakna lama an hmasawnna tur leh thil chhut thiamna kawnga hmasawnna an lo neih theihna tur atana kalpui a nih thu sawiin, zau zawk leh lian zawka an kalpui zel tur thu a sawi.

Lalhruaitluanga hian ‘Zirna Meichher - Torch to Higher Education’ tih lehkhabu a tlangzarh bawk a ni.