India chuan furpui na tak a tuar mek a, khawthlang lama Maharashtra state-ah chuan ruah sur tam lutuk avanga tui lian leh lei min avangin mi 110 vel an thi tawh.

Ruah hian khaw za chuang a tibuai a, chenna in tam tak tuiin lain mi chengte pawh tuiin a dang tangkhang nasa hle.

Chhanchhuah hna thawktuten theihtawp chhuahin nung damte hmun hima suan chhuah hna an thawk a, chin hriat loh pawh mi tam tak an awm rin a ni bawk.

Indian Army pawhin chhanchhuah hna thawktute hi an pui a; mahse, ruah a la sur chhunzawm reng tho avangin thawh chak a harsa hle.

Maharashtra hian kum 10 liam ta chhunga July thlaa ruah an dawn tam ber hun an tawng der tawh.

Tui lian nasa chu an buaina ber a ni a, mi thiamte chuan khawvel puma sik leh sa inthlak nasa lutuk chuan khaw awm dan uchuak tak tak a thlen phah a, tuna ruah sur tam bik ang pawh hi a thlen phah niin an ngai.

Zirtawpni khan thuneitute chuan thi tam ber hi district pahniha lei min leh tui lian vang a nih thu an sawi.

India sumdawnna khawpui, Mumbai chhimchhak lama khaw tê reuh te, Taliye chu lei minin a hnawl a. Thuneitute chuan mi 42 zet an thi niin Reuters news agency hnenah an sawi.

Chief Minister Udhav Thackeray chuan nimin khan Taliye khuaa chhiatna thleng hi a tlawh nghe nghe.

Thackeray hian Zirtawpni khan emergency meeting kovin thuneitute chuan harsatna tawkte mamawh pe zel turin a ti.

Tuikhuahte pawh a chim mai hlauhthawnna avangin a tui chhuah \hen a ni a, a hnuai lama awmte tan a hlauhawm theih avangin hmun himah suan chhuah an ni.

Prime Minister Narendra Modi chuan nunna tam tak chân a ni chu pawi a tih thu a sawi a, a theih ang anga puih an nih tur thu a sawi.

Indian Navy leh disaster lama thuneitute chuan vaukam hnaihah chhanchhuah hna an thawk.

Vaukam hnaih district pakhat phei chu a kalpawhna ber lei leh mobile tower a chhiat vek avangin tlawh leh biakpawh theih an ni lo.

A chengte hi tui lian avangin an in chungah an lawn a, helicopter hmangin chhanchhuah an ni.

Mumbai khawpuiah chuan Zirtawpnia in chim avangin mi pahnih an thi a, mi dang 10-in hliam an tuar bawk.

Khawpui chhung hmun hniam deuh laiah chuan rel pawh tlantir theih a ni lo va, heng hmunte hi tuiin a chim deuh vek a ni.

Khawchin zirtute chuan Mumbai bikah ruah hi a la sur nual dawn niin an sawi lawk.