Belgium-ah chuan province 10 an neih zinga paliah chhanchhuah leh tanpui hna thawk turin sipai tirh luh an ni a, hmun him lova awmte suan chhuah hna an thawk dawn bawk a. Prime Minister Alexander De Croo chuan July 20 hi thite sunna ni atan a puang tawh bawk.

Prime Minister De Croo chuan tui lian avang hian an ramah mi 20 vel an thi tawh tih a sawi a, ‘kan rama chhiatna kan tawh rapthlak ber a ni’ tiin a sawi.

Belgium thenawm ram - France, Italy leh Austria chuan Liege khawpuiah chhanchhuah hna thawktu tur an tir a, khawpuia cheng tam tak hi tui lian avangin hmun him lamah sawn an ngai.

Netherlands-ah pawh Limburg province-a khawpui eng emaw zat chu tui in a chim avangin mi sang telin an in chhuahsanin hmun him lam an pan phah a. Tui hian a lian dalna pawh a su tlang hial a ni.

Chhim lama Maastricht khawpui leh a bul hnai khuaa tui lian erawh chuan tui hi a kam leh tan tawh a, hei vang hian Zirtawpni zan khan mi thenkhat chu an inah an kir leh tawh hlawm.

Switzerland-ah pawh ruah sur nasa avang hian lui leh dilte chu a kuang an luang liam nasa hle a. Swiss khawpui, Bern-a luang tlang lui pawh Zirtawpni atang khan a kuang a luang liam tan tawh.

Lake Lucerne pawh a kuang atanga luang liamin a bul hnai khuate chu insaseng tura tih an ni a. Basel khawpuia chengte pawh lui hnaih lo tura tih an ni.

-----------------------------------------------------------------------------------

Chhanchhuah hna thawktute chuan Europe khawthlang lam tui liana dam chhuakte zawn hna an thawk zui mek a, hriat theih chinah mi 150 chuang thi an awm tawh.

Germany leh Belgium rama ruah nasa taka a sur hnua tui lian avang hian mi za chuang chin hriat lohvin an la awm bawk.

Ruah hi Switzerland, Luxembourg leh Netherlands-ah pawh a sur nasa hle a. Dutch Prime Minister Mark Rutte chuan chhim lam province pakhat, a tuar na zualah chuan ‘national disaster’ tiin a puang.

Europe khawmualpui ram hruaitute chuan sik leh sa inthlak nasa lutuk avanga khaw awm dan uchuak tak tak hi thleng niin an sawi.

Mi thiamte pawh hi khawvel lum zel chuan hetiang khuarel chhiatna, tui lian rapthlak leh ruah tui tam lutuk hi a thleng zel dawn niin an sawi bawk.

Khawvel pum hi industrial era in\an a\ang khan 1.2°C chuangin a lum tawh.

Germany-ah chuan tui lian avanga thi hi mi 100 an chuang tawh a, President Frank-Walter Steinmeier chuan nimin khan a tuar nasa zualte chu a tlawh.

“Hmun tin mai chu chhiatna rapthlak thlenna a ni mai,” tiin Steinmeier hian thuthar lakhawmtute a kawmnaah a sawi a. “Miten anmahni sak ngei in leh an nunna an chân a ni,” a ti.

Germany-ah hian Zirtawpni pawh khan ruah a la sur tam avangin chhanchhuah hna thawktute an la che hleithei lo va, mi bo chhungten chanchin hriat tumin an ngaichang reng bawk.

Phone network a chhia a, kawngpui a chhe bawk a, chhungkaw 1,00,000 chuang chuan power supply an nei lo.

Hetiang hi a nih mek laiin mi \henkhat chuan chhiatna thlen dan en chian tumin tei chhuah an tum reng a, Mainz-a police-te chuan chhuak tam lo tur leh mi tawrhna thlithlai lo turin an ngen a. Hetiang bawk hian Netherlands-a mite pawh tih an nih thu NOS.com chuan a tar lang.

Germany-ah hian North Rhine-Westphalia, Rhineland-Palatinate leh Saarland state-te chu ruah sur tuar na ber an ni.

Rhineland-Palatinate-a Ahrweiler district-ah chuan thuneituten Zirtawpni khan mi 1,300 chuang chin hriat lohvin an awm tih an sawi a; mahse, darkar tin a zat hi a tlem niin an sawi.

Schuld district-a Ahrweiler khuaa chengte chuan car-te chu tuiin a la a, an chenna inte pawh indona hmun  ang maia a sawprawp thu AFP news agency hnenah an sawi.

Rhineland-Palatinate state-a interior minister Roger Lewentz chuan thi hi an pun ngei a rinawm thu tual chhung chanchinbute hnenah a sawi a. “An chanchin rei tak kan hre lo a nih chuan, thil duhawm lo zawk kan puan a ngai dawn tihna a ni,” a ti.