Johns Hopkins University-in a chhinchhiah dan chuan khawvel pumah Covid-19 hripui chu mi maktaduai thumin an thihpui ta.

World Health Organization (WHO) hotupain khawvelin inkai darh rapthlak tak tawrh hun a hmabak mek tih a sawi hnu lawkah hetiang zat thihpui hi an tling.

India chuan hripui leng mekah hian a thawh hnihna rapthlak tak a tuar mek a, darkar 24 liam ta chhung pawh khan mi 2,30,000 chuangin an kai tih hmuh chhuah leh hman a ni.

Nikum hmasa kum tawpa a darh tan atang khan hri hi khawvel pumah mi maktaduai 140 dawnin an kai tawh.

WHO chief Dr Tedros Adhanom Ghebreyesus chuan Zirtawpni khan ‘khawvelah a kai leh thihpui chu rapthlak khawpin a la pung zel dawn’ tiin a sawi.

WHO hotupa chuan kar khat chhunga hri kai thar hi thla hnih liam taa kar khata kai thar hmuh chhuah zat let a tling thei hial dawn niin a sawi bawk.

United States, India leh Brazil ramte chu Covid-19 kai tam ber berna ram pathum an ni a. Heng ram pathumah hian thihpui pawh maktaduai chuang an awm tawh niin Johns Hopkins University chuan a sawi.

Kar hmasa khan khawvel pumah ni tin mi 12,000 vel zelin Covid-19 hi an thihpui niin news agency AFP chuan a tar lang bawk.

Hetih lai hian hri kai leh thihpui zat hi a tak takah chuan hei aia an tam daih hi rin a ni a. Ram tam takin an chhinchhiah chu rin a hlawh lo hlawm hle.