ZALEN April 1, 2025; Inrinni zan khan PS Muanga (28) Champhai Bethel veng chu Chhangphut field pavillion atangin a tla a, damdawi in panpui a nih laiin a boral.

He thihna thleng chungchangah hian insual rawnna a thleng ngei nia hriat a ni a. A mawhphurtua puh mi pakhat Lalruatthara, Champhai Kanan Veng ni-a insawi chu Inrinni zan khan Champhai police kutah a in pe. Champhai police-in an chhui zuina kal zelah thu zawhfiah turin mi 6 an man belh leh tawh a, thu an la zawtfiah mek a ni.

He thihna thleng chungchangah hian nunna chan PS Muanga nu chuan Champhai police station-ah FIR a thehlut a ni.

MZP Hqrs. Champhai chuan an executive member PS Muanga thihna chungchangah hian thu leng vak a tam hle a, a thihchhan diktak hriat a nih vat theihnan MZP headquarters, Champhai chuan hma a la zel dawn tih an tarlang a. PS Muanga thih danah hian thil fel tawk lo a awm ngei nia hriaiin Champhai police station-ah a thihna chhan dik tak chhui turin ngenna an thehlut a, pawi khawihtute chu an phu tawk hremna an hmuh theihna tura a tawp thlenga hma an lak tur thu an sawi a. Champhai police lam ten theihtawp chhuah a he thihna chungchang a hma an lak na ah lawmthu an sawi bawk.

Champhai Bethel VC pawhin thuchhuah siamin an thu thlen te ngaih pawimawh saka chak taka hma laksak tu Champhai police te an chhuang takzet tih an sawi a, vengchhung mipuite pawh dawhthei taka khawtlang hruaitute thu an ngaichang zel hi a lawmawmin veng tangrual an nih zia a ti lang chiang em em a ni tih an tarlang a. Heng thilsual ti tu te hi dan anga an chunga rorel a nih ngei theih nan hma hi lak chhunzawm zel a ni dawn tih vengchhung mipuite an hriattir a ni.

Thu lakna in a tarlan danin, PS Muanga leh kutthlaktua puhte hi tun hma lamah inhmuh thiam lohna an lo nei tawh niin hemi zan hian Chhangphut field-ah hian an inhmu a. PS Muanga hi thleng hmasa-in Lalruatthara leh a thiante hian Chhangphut field panin he thil hi a thleng zui ta a ni.

Pausianmuanga hi Pathianni chawhma dar 11:30 khan Bethel thlanmualah vuiliam a ni.