Editorial

Mipui thupek puanzar hun & inbuatsaihna hun pek

Admin - Apr 24, 2021

A tul a nih chuan meeting hun tih hma dawrh theih a ni a, thurel laimu tawi tihchhuah phawta a hnua chipchiar zawka tihchhuah leh te pawh a theih vek a ni.

April ni 20-26 chhung  Mizoram sawrkar chuan covid 19 darh zel tur venna atan inkhuahkhirhna thupek a chhuah a. Thukhawm te thukhawchang mipuiin an nghah thuap laiin April ni 19 zanlai pelhah he thupek hi tihchhuah niin social media lamah tihdarh a ni chauh a ni.

Inkhuahkhirhna thupek a chhuah tlai avangin mipuiah harsatna a thleng ta reng a.   Conventional media - print, radio leh TV lamin an theh darh hman lo a nih kha. A nihna takah chuan Serchhip bye election zawhah inkhuahkhirna khauh zawk  tihchhuah a nih rin a ni tlangpui a, mahse sawrkar lam a reh hrih avangin mipui tan inrinsiak mai lo chu tih theih a awm lo a ni ber ang chu.

Tun tum inkhuahkhirhna puan kha zan mengrei lo tan chuan hriat hman a ni meuh lo a, a tuk zingah pawh chawhmeh zuar inpho hmun thenkhatah chuan an awm nual a nih kha. District thenkhatah mipui an inrin hman loh avangin inkhuah-khirhna hman tan niah task force lam pawh an khauh tak tak hlei thei lo a ni mah zawk a ni.

State hrang hrangah hripui thawh hnihna hi a lo thleng phut a,  kan ram a lo lut dawn tih erawh hmuh lawk theih niin a lang a. State dang-ah pawh thu dengkhawng deuh rel a nih dawn chuan mipui chiai lohna turin a inkarah inbuatsaihna hun pek an ni thin a.

Hetiang hi hmang ve ta ila Mizo society inrelbawlna tha takah phei chuan philia thil lei chiam te pawh a pumpelh theih mahna.

Eng pawh nise, hetiang thil hi rel a la ngai fo dawn niin a lang a, roreltu tan pawh rorel thiam a harin a rinawm a, vawi khat tawnna a nih avangin thui tak chu hriatthiam an tul a ni. Hei hi ni mahse pumpelh theih ang chu pumpelh a tha ber tho a. Hmanhmawha thil rel ngai a awm a nih pawhin a reltute hi inbiakhlatnaa kohkhawm tham chauh an ni bawk a, a tul anih chuan meeting hun te pawh nidanga neih thin aiin sawn hma dawrh mai ni sela thupek a chhuah hma theih a beiseiawm a. A nih loh pawhin a thu laimu tal tih chhuah hmasaka chumi hnua chipchiar zawka inkaihhruaina tihchhuah leh zawk te pawh a fuh mahna.