Aizawl: Ministry of Agriculture chuan Market Intervention Scheme (MIS) atangin Hnahlan a Grape chingtute sum hloh engemaw zat pek a tum a, pawisa hi kumin financial year chhung ngeia kuthnathawktute hnenah hian pek hman tum a ni. Zalen thudawn danin MIS sum pek tur hi Ministry of Agriculture chuan an tichiang tawh a, sum pek tur zat chiah hi a la hriatloh nain vaibelchhe 2 atanga vaibelchhe 3.5 inkar beisei a ni a. Tunlai hian lehkha chinfel ngaite buaipui mek a ni. MIS atan hian Mizoram atangin Oil palm leh Grape ah te dilna hi thlen a ni a, Ministry chuan Grape hi an thlang ta nia thudawn a ni. Hnahlan Grape Growers Society hruaitute chuan MIS atanga tanpuina sum an hmu thei tur chu an lawmthu Zalen an hrilh a, sum chu tangkai taka hman an tum nia sawiin, “Kuthnathawktute Grape man ba nuai 70 vel pek kan tum bakah Mizoram Rural Bank atanga loan kan lak hi engemaw zat rulh kan tum a, a bak hi chu Winery tih changtlun nan hman theih kan beisei a ni,” an ti a. Chhawmdawlna sum an hmuh theihna atana tanpuitu Chief Minister Lal Thanhawla, Rajya Sabha MP Ronald Sapa Tlau leh midangte chungah lawmthu an sawi a ni. Hnahlan Grape Growers Society hruaitute chuan Hnahlan Winery atangin theirah hmanga in chi siam tumin hma an la mek tih Zalen an hrilh bawk a. “Kan tum anga kan tih theih chuan grape juice atangin frooti, coca cola leh fanta ang chi bakah Wine tui tak siam kan tum a. Bajaj company nen pawh kan inbe tawh a, company lam hian markey survey pawh an nei tawh a. India ramah fruit base atanga hetiang siam an la awmlo nia kan hriat vangin beiseina sang tak kan nei a ni,” an ti.