Miss World thlanna neih zawh takah Poland nula Karolina Bielawska chu Miss World 2021 atan thlan a ni. 1st Runner-Up chu United States aiawhtu Shree Saini niin, Ivory Coast nula Olivia Yacé chu 2nd Runner-Up a ni - India aiawhtu Manasa Varanasi pawh top 13-ah a lang ve bawk. 

Kum 23 mi Karolina Bielawska hi Polish zinga Miss World title la thei pahnihna niin, Miss World 2020 Toni-Ann Singh chuan  crown a khum tir a ni. Miss World thlan vawi 70-na hi nikum December 16 khan neih tum a ni a, mahse Covid-19 avangin a hun sawn a ni a, March 16 khan San Juan, Puerto Rico (Coca-Cola Music Hall) ah neih a ni ta a ni. 

Karolina Bielawska hi profession fashion model niin, April 11, 1999 khan Łódź, Poland-ah a piang a ni. Kum 2019 khan Miss Polonia atan thlan niin, hemi hnu hian Miss World atan hian a inbuatsaih zui a ni. Karolina Bielawska hi 5'10 feet a sang niin, Miss World 2021 atana thlan a nih hnuah a chanchin hian ngaihven a hlawh zual hle a ni. 

Ngaihven hlawh Shree Saini
Miss World 2021 first runner-up Shree Saini hi Indian-American niin, Miss World thlannaah khan USA ai a awhin a tel. Punjub-a piang ni mahse US-ah an pem a, khua leh tui nihna a nei zui bawk. 

Kum 5 mi lek a nih laiin an chunghkuain US-ah an pem a, klhua leh tui nihna an nei zui ta a ni. Kum 26 mi Shree Saini hi kum 12 mi lek a nih laiin lung lam harsatna a neih avangin pacemaker vuah sak a ni a, lirthei chesualah telin a hmai chu nasa takin a kang bawk. Harsatna tam tak paltlangtu he nula huaisen hian tan a hlawh a, an ram mipui maktaduai 333 te aiawhtu leh India atanga US-a pemte aiawha ding a nih thu a sawite chuan mi thinlung a hneh hle.