Aizawl: Nimin khan Mission Veng chuan an kum 125-na tlin champha an lawm a, an veng kum 125 tlin ni tak chu naktuk, October 23 hi a ni a, Pathianni a nih avangin nimin khan a lawmna pui ber an hmang a ni.

Kum 125-na lawmna atan hian nimin zing karah khan Banglapui tualah MUP kaihhruaiin jubilee dár an vua a, chawhma dar 10-ah Mission Veng Local Council Chairman Ramengmawia Ralte-in kum 125-na hriatrengna lungphun a hawng a, Rev. C. Rosiama’n tawngtaiin a hlan a ni.

Chhunah nilengin Mission Veng Kohhran Hall-ah kum 125-na lawmna neih a ni a, chawhma leh chawhnuah hun hman a ni a, kum 125-na puala souvenir siam tlangzarh a ni a. Mission Veng 125 Zaipawl an zai bakah mi mal leh group zaite ngaihthlak a ni bawk.

Mission Veng dintua ngaih, Rev. DE Jones (Zosaphluia) bakah, Rev. FW Savidge (Sapupa) leh Rev. JH Lorraine (Pu Buanga) te chu October 23, 1897 khan Thingpuihuan Tlang, MacDonald Hill atangin tuna Banglapui hmunah an insuan a, chu chu Mission Veng din ni-ah pawm a ni.

Mission Veng kum 125-na hi kumin September 8 zan khan lawm tan a ni a, thil chi hrang hranga an lawm hnuah nimin khan a lawmna pui ber an hmang a, kumin December 2-ah kum 125-na lawmna an khar dawn a ni.