ZALEN April 14, 2025; Mizo damlai zinga upa ber Pi Buangi (Lalneihsangi) chuan April ni 14, 2025 (Thawhtanni) hian kum 108 a tling ta a, kum 109 a hmang tan ang. A piancham hi a laina hnai ten an lawmsak.

Pi Buangi hi Aizawl Venghnuai a piang leh seilian niin; an chhungkua hi Salvation Army zawm hmasate zinga mi niin; a pa chu Thangchhunga CSM, Mizorama (Kohhran Upa) Corps Sergeant Major hmasa ber a ni a, Thakthing Lal, Paliana Khawchhiar a ni. Rev. Sena nupui Pi Buangi hi Mizo zinga Rehab a thawk hmasa te zinga mi a ni a, Behala Girls Home Kolkata a hmeichhe rahbi tleu leh naupang paih te enkawlna hmunah a thawk thin a. Talent tha tak a nei a, Puan thui, puan tah leh la phiar a thiam hle a, ṭawng chi hrang 5 a thiam bawk. 

Kum 2022 khan Heritage Award buatsaih Mizo Hmeichhe Chhuanawm "Women of Substance" hlan a lo ni tawh a. Aizawl Municipal Corporation (AMC) chuan kum 2024 khan Aizawl khua leh tui a upa ber nihna chawimawina a lo hlan tawh.

Tunah hian a makpa H.V Lalringa I.A.S Rtd. te In, Khatla ah a cheng mek a. Ebenezer Corps Venghnuai ah a lawi a ni.