ZALEN April 7, 2025 : Sri Lanka news website www.adaderana.lk in Thawhtanni chawhnu lama a tarlan danin Mizo hmeichhia chu Bandaranaike International Airport (BIA), Sri Lanka ah cocaine nen man a ni tiin a ziak a, cocaine an mansak hi Rs. 65,760,000 hu niin he website hian a tarlang.

India mi, Mizo hmeichhia kum 29 a upa hi Sri Lanka Police Narcotics Bureau (PNB) chuan an man a, an chhui thuina atanga a landanin he nu hian tunhma lamin Sri Lanka hi vawi thum lai a lo tlawh tawh a ni.

Thulaknain a tarlan danin he nu hi Chennai atanga BIA-a tum niin tukin zinglam khan Sri Lanka hi a thleng a ni. PNB thuchhuahin a tarlan danin cocaine an man Kg 1 leh gram 644 hi a suitcase mawngphah lem siam chawp chhunga thuhruk a ni a, polythene a fun chhawn niin an sawi.

Tarlan danin Thawhtanni chawhnu lam khan India mi pakhat an man a, he an mi man hi Mizo nu in cocaine a pek tur niin a inpuanna atangin an hrechhuak a, Kollupitiya hotel pakhata inhmu tur an nih thu PNB te hnenah hian a puang ta a ni.

Mizo nu leh a thurualpuite hi Negombo Magistrate’s Court ah an inlan ang a, tunah hian police te kutah thu zawhfiah atan an awm mek niin thulakna chuan a sawi bawk.