Aizawl September 8, 2023 : Vawiin khan School Education Department Directorate Conference Hall-ah International Literacy Day hman a ni a, School Education Department Secretary Dr. Lalzirmawia Chhangte-in khuallian niin he hun hi a hmanpui. Mizoram chu ziak leh chhiar thiam vekna tur atana hmalakna tur zingah a tel.

Dr. Lalzirmawia Chhangte chuan he hunah hian thusawiin India sawrkar chuan Union Territory zawng zawngah leh state thenkhat ziak leh chhiar thiam lo an tlem na Goa, Mizoram leh Sikkim te chu kum 2023-24 chhungin ziak leh chhiar thiam zaa za a puan a tum a ti a. Hemi chungchangah hian August 21,2023 khan virtual mode-a meeting neih a ni a, meeting-ah hian heng UT leh state pathum ten ziak leh chhiar an thiam vekna tur ruahmanna siam a ni a ti bawk.

School Education Department Secretary chuan Literacy hi society hmasawn tehna pawimawh tak a ni a ti a. Ziak leh chhiar thiam pawimawhna leh hlutna sawiin Literacy chu zirna innghahna lungphum a ni a, mahni inngaihhlutna a siam a, nunphung a tichangtlung a, hriselna a ti tha a, retheihna umbo nan a tangkai a ni a ti a. Ziak leh chhiar thiam hian hmeichhia leh mipa inthlauhna a tiziaawm a, democracy hlutna a chawisang a ni a ti bawk.