Aizawl: Mizoram sum thawh chhuah gross state domestic product chu kum hmasa 2016-17-ah vaibelchhe 16,698.76 niin kum kalta 2017-18 khan vbc 19,174.34 a ni a, kum hmasa aia a punna hi 14.82% nia chhut a ni.

Tun hnaia Finance Minister Zoramthanga’n budget pharh ruala a pharh tel Economic Survey 2018-19-a tarlan danin States Own Tax Revenue (SOTR) pawh a pung chho zel a, SOTR hi kum 2015-16-ah vbc.358.41, 2016-17-ah vbc 441.81 niin 2017-18-ah 549.91 niin a tarlang.

Report tarlan danin Gross State Value Added (GSVA)-ah hian primary sector an tih mai, agriculture leh a behbawm (Agriculture & Allied sector) chuan kum 2017-18 chhunga an thawh chhuah chu 29.93% nia chhut a ni. Agriculture bakah hian industry sector lung lak (mining & quarrying), thil siam, electric, gas, tui pek etc. ten an thawh chhuah ve chu 25.05% a ni a. Service sector-a thawk (transport, hotel & restaurant, finance etc.) chuan 45.03% thawk chhuakin sector 3 zingah hian an thawkchhuak hnem ber.

Mizoram mipuiin kum khat chhunga mi tinin sum kan thawh chhuah (per capita income) chu kum 2017-18-ah Rs. 1,33,951 ni tura chhut a ni a, per capita income hi kum 2016-17-ah Rs. 119763 a ni.

Economic survey 2018-19 tarlan danin kum 2011 chhiarpuiah khan Mizoramah mihring 10,97,206 awmin hei hi India ram mipui awm atanga tehin 0.09% a ni a, kum 10 chhunga a punna hi 23.48% niin India ram punna 17.64% aiin a sang hle a ni. Chhiarpui atanga a lan danin India ramah sq.km khatah mihring 382 zel cheng anga chhut anih laiin Mizoramah chuan sq. km khatah mi 52 cheng ang an ni.

Aizawl district chu mihring bitna ber a niin sq. km khatah mihring 112 cheng ang an ni a, a thawlna ber Mamit district-ah chuan sq.km khatah mihring 29 cheng anga chhut a ni. Mizoram mi cheng zinga 91.33% chu ziak leh chhiar thiam an ni a, India ramah a sang lama 3-na niin Serchhip district ah ziak leh chhiar thiam an tam ber a, 97.91% niin a tlemna ber Lawngtlai district-ah chuan 65.88% a ni thung.

Mirethei kan tih mai below poverty line (BPL) zirchiannaah chuan Mizoramah BPL chhungkua 51391 an awm mek nia tarlan a niin hei hi Mizorama chhungkaw awm 280724 atanga chhutin 18.31% a ni a. Mamit district-ah BPL chhungkua tam berin chhungkaw awm 20163 zinga 7186 chu BPL niin hei hi a percentage a chhut chuan 35.64% a tling a. Aizawl district chu a tlemna ber niin chhungkaw 85312 zinga 7475 chu BPL an ni a, za zela chhutin 8.76% an awm a ni.