Aizawl: Mizoram Kohhran Hruaitute Committee (MKHC) a tel hruaitu thenkhatte chuan kristian te ni pawimawh bawhthuah a Serchhip bial bye election neih a ni chu pawi an tih thu ZALEN zawhna chhangin an sawi a, sakhaw zalenna zia a bo hret hret nia a lan thu leh tun hnu ah hetiang ang remruatna a awm zel a nih chuan kohhran te pawh pressure group ang a an chet a la ngai mai thei niin an sawi.

Serchhip bial bye election, April 17, 2021 (Sabbath ni) a vote thlak leh May 2, 2021 (Pathianni) a vote chhiar tur chungchang ah ZALEN zawhna chhangin MKHC chairman leh Synod moderator ni bawk Rev. Dr. C. Lalhlira chuan an tih theih chin inthlan hun sawn dilna ECI ah an thlen tih sawiin, pressure group ang a nawr vak vak chi ah an ngaih loh rualin, loh theih loh a pressure group ang a an awm a la ngai ve dawn pawh a nih mai theih thu a sawi.

Baptist Church of Mizoram (BCM) Gen. Secretary Rev. F. Ramdinmawia chuan Pathian kan biak ni pui ber a inthlan leh a kaihhnawih huaihawt chu tha a tih loh thu sawiin, BCM rorelna sang ber, Assembly ah Pathianni programme (Inkhawm tibuai thei) ang chi central sawrkarin Mizoram ah rawn huaihawt lo se tih an pass tawh thu leh chu chu Central sawrkar lo hriat turin CM Zoramthanga hnenah an thehluh tawh thu a sawi.

Salvation Army, India Eastern Territory a Territorial Commander Commr. Lalzamlova pawhin, central lamin zawi zawi a min nek mek zel ni a lang chu ngaimawhawm a tih thu sawiin, pressure group ang em a kohhran kal chu a dik lo maithei a, mahse ti lo thei lo ang a min nawr hun te a awm palh angem tih a hriat tawh loh niin a sawi. Serchhip by election neih dan hian a lehpek ah tan a ti har ang em tih pawh ngaihtuah thiam har tak a nih thu a sawi.

UPC (NEI) General Superintendent leh MKHC Secretary Rev. R. Lalrinsanga chuan inthlan buatsaihna a tan ni dang a tam thu sawiin, kristian ram kan nih thu leh kristian te ni pawimawh kan ngai pawimawh thin dan pawh an hriat thu a sawi.

Bishop Stephen Rotluanga pawhin, kristiante ni pawimawh min ngaihpawimawh sak lo chu pawi a tih thu sawiin, democracy ram kan nih chhung chuan sakhaw zalenna kan neih thu a sawi a, chumi a nih loh chuan sakhaw zalenna zia a bo hret hret nia a lan thu a sawi a. Tun a kan awm dan chuan India constitution thlengin a nghawrnghing chho zel ang tih te pawh a hlauhawm thei ni a a ngaih thu a sawi bawk.