ZALEN August 8, 2023 : Vawiin khan Hnahlan Grape Farming & Processing Co-Op Society Ltd leh RR Sales, Delhi ten thawhdunna thuthlung MoU an ziak.

Hnahlan Winery a siam Isabella Wine Mizoram pawna hralhna tura MoU ziahna ah hian H.Rammawi, Vice Chairman, Mizoram State Planning Board leh Dr. ZR Thiamsanga, MLA ( Champhai North) te an tel a, Planning & Programme Implementation Office ah neih a ni. Hnahlan Grape Farming & Processing Co-Op Society aiawh hian Francis Lalmalsawma Sailo a tel a, an Chairman C.Vanlalhriata chu signatory a ni. RR Sales, New Delhi aiawhin V.Lalrindika, Director, Bussiness Development, RR Sales, New Delhi in hming a ziak bawk a ni. 

Kumin 2023 hian Hnahlan leh a chhehvel ah Grape seng mek a ni a, tun dinhmun ah quintal sang chuang an seng tawh a ni . Hnahlan Winery ah hian kum hlui lama wine siamsa leh kumin a mi nen litre nuai hnih chuang hralh tur an nei tura beisei a ni. Hnahlan leh a chhehvel ah hian chhungkaw thahnnem takin  grape chin hi eizawnnan an hmang mek a. Grape huan siamthar an pung mek bawk a ni. Mizoram sawrkar hmalakna in grape huan tuaithar (Rejuvenation project) buaipui mek a ni bawk. SEDP leh FOCUS atangin grape chingtu ten tanpuina an dawng bawk  a ni. Kum 2010 a hawn Hnahlan Winery pawh  production capacity tih len bakah khawl leh hmanraw changtlung leh thar  zawk nen a thuam thar tum a ni bawk.