ZALEN April 2, 2025; Mizoram quarry association hruaitute chuan, SLT Maubuang rama rawra her mekte chu mimal, NGO, kohhran leh department te pawhin dawr tawh lo turin an ngen.

Vawiin (2.4.25) chhun dar 12 khan Aizawl press club-ah thuthar thehdarhtute kawmin, Mizoram quarry association hruaitute chuan kan ramah company hrang hrang Mizoram pawn atangin an lo lut tih an sawi a, chung ho chuan kan ram hmasawnna tur development work hrang hrang an rawn thawk niin an sawi.

"Company te hian an hnathawhna atan chauh mining permit (lung lak phalna) an nei a, an hna a an hman tur bak pawn lamah hralh chhuah phalna an nei lo. Heng company te hi tumah dawr tawh lo turin mipui, NGO leh department te kan in hriattir a, pawn lama hralh hian Mizoram sawrkarah chhiah an pe lo a, keini ang state rethei tan channa nasa tak a ni," tiin an sawi.

"Kan ramah hian Quarry permit nei lova lung la leh her tam tak an awm a, heng mite hian sawrkarah chhiah (Royalty) an chhung lova (Sawrkar tan pawh hian channa nasa tak a ni). A chhan chu sawrkar in mining check gate a siamah hian Dan in aphut Form ‘O’ pek tur an nei lova, engtin tin emaw an tlang thin a, heng form ‘O’nei lo te hi Dan phal loh a sumdawng an ni tih mipuiin kan hriat tlan tha in kan hria," ti bawkin, "Form ‘O’ hi phek 3 rawng in ang lo a ni a, a sen hi mining check gate-ah thehluh tur a ni a, a pawl hi a bu a awm driver copy/ customer copy tur a ni a, a var hi a bu a awm tur permit holder tan an inchhui letna tur a ni. Form ‘O’ ah hian cubic meter dik tak ziah a ni a, rawra emaw boulder leituten cubic meter dik tak in lei leh lei loh in lo inenfiahna tur a nih bakah Form ‘O’ hi a leituten lo dil ngei ula. Hei hi lung in leite a zat in lo check na tur a ni tih in hriatfiah na mipuiah kan han puangzar a ni e," tiin Mizoram quarry association hruaitute chuan an sawi.