January 10, 2023; Tripura relief camp hrang hrang a awm Mizoram a vote nei mi 3,599 te chu Mizoram electoral roll atanga paih an ni tawh a, paih hmabak 7,651 an la awm.

Mizoram election department hotute hnen atanga ZALEN thudawn danin, tun thlenga Mizoram e-roll atanga paih tawh Bru te hi Mamit district a vote nei mi 3,088, Kolasib district a mi 175 leh Lunglei district a vote nei mi 336 an ni.

Mizoram e-roll atanga paih hmabak hi Mamit district ah voters 5,405 an la awm a, Kolasib district ah voters 1,730 leh Lunglei district ah 516 an la awm.

Kum 2020 January thla a sawrkar laipui, Mizoram leh Tripura sawrkar leh Bru pawl hrang hrangte inremna angin Tripura relief camp a awm, Mizorama kir leh duh lo te chu Tripura a an inbenbel remtih a ni a. Heta inbengbelte hi Tripura electoral roll-a an hming thun vek a, Mizoram electoral roll atanga an hming paih tur a ni.Kum 2018 Assembly inthlanpui-ah khan Tripura a awm, Mizoram Electoral Roll-a hming la chuang si Bru mi 11,000 chuang an awm.