November 17, 2022; Mizoram Pradesh Congress Committee (MPCC) hruaitute chuan, Mizoramin state a nih kum, kum 1987 atanga kum 32 chhunga leiba a neih chhoh zel tlingkhawm leh MNF sorkarin kum 3 chhung leka leiba a neih chu a inzat thuak tawh tih an sawi.

Vawiin chhun dar 12:30 khan Aizawl press club ah thuthar thehdarhtute kawmin, MPCC thupuangtu Lallianchunga chuan, sum leh pai enkawlna lama MNF sawrkar an talbuai em avangin Mizoramin harsatna nasa tak a tawk mek tih a sawi a, "MNF sorkar hnuaiah Mizoram hi leiba thang (debt trap) ah a tang mek a ni," a ti.

Kum 2018 congress sawrkar kum tawp thlengin Mizoram sawrkarin leiba a neih zat chu cheng vbch. 7315 a ni tih sawi bawkin, MNF sawrkar hnu kum 3 chhung lek (2019-2022) ah Mizoram leiba chu cheng vbc. 12553.08 ah a pun chhoh thu a sawi.

"MNF sawrkar hian a sum leh pai mamawh hmuh nan puk tur a hriat a piang a puk ta hmiah hmiah mai a ni," Lallianchhunga chuan tiin, "Open Market Borrowing (OMB) hmanga RBI atanga kumin (2022-2023) a a puk theih zat tura bituk cheng vbc 990 pawh a thleng tep tawh," a ti a. "Sawrkar hnathawk hlawh pek dawn apiangin puk tur a zawng a ni ber. Sawrkar lo awm leh tur tan pawha rulh huphurhawm tak, chet ti harsa tham leiba an hnutchhiat ngei dawn a ni," a ti bawk.

MPCC thupuangtu Lallianchhunga thusawi thenkhat:

• Sorkar kum (2022-2023) kal mekah hian Mizoram sorkar leiba rulhna atan Budget-ah cheng vbch 1337.90 dah a ni.
• Hei hi hmasawnna hnathawh tak takna tur sum (Capital Outlay) atana an dah cheng vbch 2663.14 zat ve hmawk a tling. Aactual-ah chuan leiba rulhna atan hei aia tam hi an hman a ngai ang.
• Kum 2020-2021 ah pawh khan Capital Outlay-ah cheng vbch 1125.97 an dah laiin, a aia tam daih cheng vbch 1617.89 chu leiba rulh nan an hmang.
• Sawrkar hnathawkten a hun taka hlawh lak an nei thei ta reng reng lo.
• GP Fund an la thei hek lo. Sawrkar hnathawk pension-te pawhin chhuahpui nghal tur pawisa an nei thei ta lo.