June 28, 2023; June 26, 2023 (Thawhtanni) zing dar 9:30 a boral, Mizorama zosap Missionary lo chhuak te zinga Mizoram chhuahsan hnuhnung ber, Pi Zomawii (Miss JT Smith) sunna hun Mizoram Baptist Kohhran (BCM) chuan tun Pathianni hian an hmang dawn.

Pi Zomawii (Miss JT Smith) hi Scotland, Dundee khua a kum upa te enkawlna hmunah kum 85 mi ni in a boral a. A vui hun tur leh vui dan tur ruahman fel a la ni lo ni a hriat a ni.

Pi Zomawii (Joan. T. Smith) hi kum August 14, 1938-ah Dundee, Scottland-ah a piang a, a pa chu John Samson Smith a ni. Nurse a zir zawh hnu-ah Missionary-ah inpe-in Baptist Missionary Society (BMS) chuan Mizoram-a thawk turin 1964-ah a rawn tir a, Mizorama awm phalna a nghah chhungin Colcatta ah thla riat a awm a, July 15, 1965-ah Serkawn thlengin, Medical Quarters-ah amah lawmna neih a ni a, Kristian Hospital, Serkawn-ah Nurse hna chu a zawm ve ta nghal a ni. Damdawi in leh Nurse Trainingnaah zirtirtu hna  a thawk a. Mizotawng thiam tak niin, Kohhran enkawlna kawng ah pawh TKP leh BKHP ah te theihtawpa inhmang in, Kristian Naupang Pawl enkawltu te zinga mi pawimawh tak a ni bawk. Mizoram a buai tak avangin 1968-ah BMS-in Mizoram chhuahsan turin an ko haw a, 1972-ah Mizoram-ah lo let lehin, 1977 thleng a thawk ta a ni. Mi zawng zawngin an ngainat a ni a, mizo hmingah ‘Pi Zomawii’ tiin an phuah a, chu chu a thihni thlengin Mizo hming-ah a pu hlen ta a ni.

Mizoram a chhuahsan hnu hian chawl mai lovin ama sum sengin China ramah Missionary-te puiin a thawk leh a, hetah hian BCM Missionary te nen pawh in be pawpin, a tulna apiangah an in chhawmdawl tawn veleh nghe nghe a ni. China ram bakah Khawvel hmun hrang hrang ah mahni inchawm (Self Support)-in kum upa tak a nih thlengin missionary rawngbawlna hna a thawk zel a, tar chaklo tak a nih hnu-ah, a pianna khua Dundee, Scotland ah kum upa te enkawlna hmunah awm-in, hetah hian a hun tawp a hmang ta a ni.

Mizoram Baptist Kohhran General Secretary charge la lai Rev. Dr. R.Lalthanmawia chuan "Zofa te tana missionary thawhhlawk tak- Nursing School lama a sulsutu te zing ami leh mizo naupang te zinga rawngbawlna kawnga thawhhlawk tak mai, Mizoram atanga a haw hnu pawha khawvel hmun danga kum upa tak a nih thlenga Pathian rawngbawla a thatlai hun zawng zawng hmangtu Pi Zomawii hi Mizoram Baptist Kohhran chuan kan ui takzet a, a rawngbawlna kaltlanga Pathian hnathawh te kan theihnghilh ngai tawh dawn lo a ni" a ti.