Aizawl January 10, 2023: Assam Rifles 23 Sector chuan Deputy Inspector General (DIG) thar Brig. Girish Upadhya an nei a, DIG kal chhuak Brig. Digvijay Singh hnen atangin mawhphurhna a la tan. 

DIG thar leh DIG kal chhuakte hian vawiin January 10, 2023 khan Sector Hqrs-ah thuthar thehdarhtute an kâwm. DIG thar Brig. Girish Upadhya chuan, Mizoram tan theihtawp chhuahin hma an la dawn tih sawiin, an hmalakna leh hnathawhnaah Mizoram mipui nen tha taka an thawhho a beisei thu a sawi.

DIG kal chhuak Brig. Digvijay Singh chuan, Mizoram a awm chhungin mipui nen thawhhona tha tak an neih avangin a lawmthu leh hun kal zel turah pawh AR leh Mizoram mipuiin thawhhona tha tak an neih zel a beisei thu a sawi.

Brig. Digvijay Singh chuan, Mizoramah ruihhlo a hluar thu leh AR-te'n ruihhlo dona leh man chhuahnaah theihtawp an chhuah thu a sawi a; ruihhlo do kawnga thawhpuiah Mizoram mipui a sáwm. Brig. Digvijay Singh hian nimin khan Mizoram a chhuahsan nghal a ni.