Aizawl June 25, 2023 : Mizoram pumah pianphunga rualbanlo, ‘Persons with Disability’ mi 15,160 an awm anga chhinchhiah a ni a. Rualbanlote tana sawrkarin hna a hauhsak (reservation) chu a kalpui tha tawka ngaih a ni.

ZALEN-in PwD Commissioner Vanlaldiki Sailo hnen atanga thu a dawn danin Mizorama rualbanlo chhinchhiah 15,160 zinga 8,198 hi mipa niin 6,962 chu hmeichhia an ni a, heng mite bakah hian chhinchhiah loh mi eng emaw zat an la awm rin a ni.

Rualbanlote tana sawrkar hna 4% hauhsak chu Mizoram sawrkarin a kalpui tha nia a hriat thu sawiin PwD Commissioner Vanlaldiki Sailo chuan, “Sawrkar department hrang hrangte hian an kalpui tha hlein kan hria a, eng emaw tih nachang hre lote chu lehkhain kan umzui zel a. PwD quota hmang hian rualbanlo mi 100 ve zetin hna an hmu tawh a ni,” a ti.

Sawrkar office, biak in leh vantlang punkhawmna hmuna rualbanlote kal ve theihna tur siam kawngah erawh duhthusam lo a tam nia sawiin PwD commissioner chuan, “Vantlang punkhawmna hmunte hi rualbanlote tana thlen theih vek tura siam tur a ni a. PwD-te wheelchair an kal vena tur (ramp) te, an inthiarna tur bik (special toilet), lift-ah pawh mitdelten an hriat ve theih tur a ri awm ngeite hman tur a ni,” a ti a; mahse, hengte hian ngaih pawimawh a hlawh tawk lo deuh nia a hriat thu a sawi.

Building sak tawhte pawh siam that leh a ngai nia sawiin Diki chuan, “RPwD Act 2016-ah chuan rualbanlote kal ve theihna turin tun hma building hlui deuhte pawh siam that leh nan February, 2022 thleng hun a pe a; mahse, heti chung hian la siam that loh a tam hle a ni,” a ti a. Hengte hi siam tha turin ziakin lehkha an pe a, hma la turin an hriattir niin a sawi bawk. 

PwD commissioner chuan tun hmaa rualbanlohna chi sarih awm thin kha tunah chuan chi 21 a awm tawh tih ZALEN hrilhin rualbanlote certificate pechhuak thei doctor hi an awm tlem avangin June 19 & 20 khan phai lam mi thiamte chah chhuakin Mizoram doctor-te training an pe niin a sawi a. A hmaa rualbanlo certificate pe tura Aizawl kal kher ngai thin kha training neih hnu hi chuan a ngai tawh dawn lo niin a sawi.