ZALEN November 17, 2023 : Zirtawpni hian Mizo Hnam Runah chhung inkhawm neih a ni a. Hun hnihna Political session-ah MNF Adviser leh RD Minister ni bawk Lalruatkima chuan thu a sawi. Mizoramah sawrkar a inthlak apiangin party leader te an din naah an tla thin a, Zoramthanga chu a tlin loh hlauhna a awm lo niin a sawi a, an tlin ngei a rin thu a sawi.

MNF Adviser chuan ‘Pathian leh Kan Ram Tan’ tia beitu MNF sawrkar chu harsatna tinreng paltlang chungin, mipui nitin mamawh erawh hnianghnar takin a pe thei a. ‘Min dintu Pathian hian kawng lak lawhah min kalsan lo ang tih ka ring tlat a. Hlauthawng miah lovin MNF hian sawrkarna kan lak leh hi ka ring tlat a ni. Hnehna kan chang a nih chuan mipuite hnenah lawm thu sawi hi kan tih tur hmasa ber a ni ang’ a ti.

Ruatkima chuan 'sawrkarna siam zo an awm lo ang. Thawkho sawrkar a din a rinawm' tih hi inthlan kan hriat tawh thlir letin a dik ngai lova. Party te zawkin a lian zawk behchhana mipui hruaikawi tuma an campaign auhla mai a ni. Inthlan zawh hnua thawhhona (post poll alliance) hi din chawp ngaiin a la thleng ngai lo. Mizoramah sawrkar inthlak a awm apiangin party leader te an din naah an tla thin. Kan leader Pu Zoramthanga hi a tlin loh hlauhna nei tumah an awm lo. Chuvangin he ram leh hnam tan hmachhawp hrang hrang kan neihte a hlawhthin theih nan Pathianin hun tha min pe ang a, Zoram mipuiin hun min pe leh ang a, sawrkarna kan chang leh ngei ang. A chhan chu inthlan zawh takah khan MNF Party te hi a thawkrim leh taima, tangrual tha ber kan ni. Party ngelnghet kan nihna leh thawhrimna te chhunzawm zel ila Pathianin mal min sawm zel ang tih ka ring tlat a ni a ti.

Aizawl West II MNF Candidate chuan inthlan kan zova, a tute pawhin beiseina sang tak nen inthlan result kan nghak mek tih sawiin, khawthlang lam leh chhim lam bial, minority te tamna bial 10 ah hian bial 5 aia tlem lo MNF in lak a beisei thu sawiin, “Kan lak bang hi Congress leh BJP in an lak a rinawm a. Kan lak ngai lohna bialah kutzungtang kan thliak thei tawh dawn a, kan chak a rinawm. ZPM hian bial 30 la awm atangin majority an lak phak hi a rinawm lo a ni” a ti.