Aizawl: Mizoramah kum telin fur a inthlak hret hret a, fur hi a tawlh hla deuh zel a. Hetih lai hian sik leh sa pawh a inkar zau tial tialin khaw lum leh vawt inkar pawh a zau tial tial bawk.

Zalen-in Science & Technology department thawktu te hnen atanga thu a dawn danin Mizorama ruahtui tlak tam lai ‘fur’ intan hun chu a kum telin a tlai chho hret hret a, fur hian kum tawp lam a hnaih tial tial a ni. Tun hma lama May thla emaw vela furtruahtui tam tak thin kha insawn hret hretin kum tawp lam an hnaih hret hret a. Tun hma a favang ruahtui hul hun tawh angah pawh ruahtui hi a la tla hnem hle niin an sawi.         Ruahtui tla hi kum 30 kalta ngaihtuah chuan a tlem hret hret a; mahse, a tlemna hi a tam lutuk lo niin an sawi thung. Nikum 2020 chhung khan Aizawl khawpuia ruah tla zawng zawng zat chu 1727.8 mm a ni a, ruahtui hi thla tin 143.9 mm tla ang a ni. Nikum chhung khan October thlaah ruahtui tla tam berin 385 mm a tla a, March leh December-ah te ruahtui tla a awm lo.

Sik leh sa chungchangah pawh thil inthlak thleng danglam lutuk awm lo mah se, khaw lum leh vawt inkar chu kum tin a zau tial tial niin an sawi a. Khua hian lum lam a pan zel laiin khawvawt pawh a hniam/vawt zawngin a kal a, an inthlauhna hi a nasa (extreme) tial tial niin an sawi a. Nipui laiin kum tin khua a lum chhoh zel laiin thlasikah pawh khua a vawt zual tial tial tih an sawi bawk.    

Nikum chhunga khaw lum leh vawh zawng chawhrual chu 22.3 degree celcius a ni a, nikum chhunga khaw lum ber ni chu April 14, 2020 niin hemi nia khaw lum lam chu 33.6 degree celcius a ni a, a vawh ber chu January 26, 2020 niin hemi ni a khaw vawh lam chu 7.3 degree celcius a ni thung. 

Science & Technology chhinchhiahna atanga a lan danin Mizorama khaw lum ber chu April 13, 2017 niin hemi nia khaw lum lam chu 36.5 degree celcius a ni a, khaw vawh ber ni  chu January 13, 2017 niin hemi nia khaw vawh lam chu 2.7 degree celcius a ni.