Aizawl: Nimin zing khan Lunglei district MJA hruaitu hlui leh hruaitu thar te chuan President kalchhuak ta H.Lalthansanga, Lunglei Times Editor In Ramthar vengah mawhphurhna an inhlan.

    MJA President kalchhuak ta H.Lalthansanga chuan MJA Lunglei Dist President term hnih a chelh chhunga Office Bearers te leh member ten tha taka an thawhpui avangin lawmthu a sawi a, thawhhona tha tak an neih avangin mualpho lovin term a hman zawh theih thu leh member zawng zawngte chunga a lawmthu sawiin, hruaitu tharte duhsakna a hlan bawk a ni. President thar Laltlanthanga, Editor Hlimthla pawhin member zawng zawngte thawhpuina tha nen lo chuan pawl kaihhruai a huphurh thu leh thawhhona tha tak nen chuan tha taka pawl a kal zel theih a beisei tih sawiin, hruaitu hmasa te hmachhawp bawhzui ngai tam tak awm te pawh tha taka bawhzui a nih a, pawlin hmasawnna thar a neih theih nan a O.B puite leh member zawng zawngte thlawpna a ngen bawk a ni. 

    Charge inhlanna hunah hian President kalchhuak H Lalthansanga'n President thar Laltlanthanga hnenah mawhphurhna a pe a, Vice President kalchhuak Lalrintluanga Khiangte in Vice President thar Thanghmingliana Renthlei hnenah mawhphurhna pein, Treasurer kalchhuak Laltlanthanga'n Treasurer thar V. Rokhawlkima hnenah mawhphurhna a hlan bawk. Lunglei district MJA ah hian Johan Lalhmunmawia chu General Secretary niin Information Secretary ah Rodingliana Khiangte leh Finance Secretary ah P.C Lalduhthlanga te ruat an ni.