Aizawl June ni 19,2023 : Vawiin ni 18.6.2023 (Thawhtanni) khan Mizoram Journalists' Association President C. Lalrambuatsaiha chuan Aijal Club-ah Dr. Roluahpuia lehkhabu ziak 'Nationalism in the vernacular : State, Tribes and the politics of peace in Northest India' a tlangzarh a. Thu sawiin, "Pathian in Zofate hi tum neiin min suihkhawm a tum niin ka hria," a ti.

Lehkhabu tlangzarhtu C. Lalrambuatsaiha chuan British in Mizote chu ram pathum India, Bangladesh leh Burma ah te min thenhrang nia sawiin hmun hrang hrangah awm mah ila Pathianin tum a nei nia a hriat thu a sawi a. "Burma buaina avang te leh Bangladesh buaina avangin mi tam tak an inpui Mizoramah an rawn tlanlut a. Tunhnaiah Manipur buaina avangin mi tam tak an Jerusalem ah an rawn lut bawk a, heng mite hi sawrkar leh mipui ten duat taka an lo tuamhlawm hian inpumkhatna kawng kan zawh tih a entir niin ka hria a ni," a ti.

MJA President chuan Mizote inpumkhat a pawimawhzia sawiin, "Zohnahthlak zawng zawng hi nuai 30 emaw vel lek kan ni a, hnamdang ngaihtuah chuan kan la tlem hle. Hetih karah inseh neuh neuh te kan awm thin a, hei hi Pathian hian remti lovin kan pumkhat zelna atan kan unaute harsatna tawh hi min hruaikhawm tumna hmanrua ah a hmang dawn niin ka hria a ni," a ti bawk.

Lehkhabu ziaktu Dr. Roluahpuia chu mi lehkhathiam thei tak a ni tih sawiin C.Lalrambuatsaiha chuan, "Harsatna tam tak patlang leh chumi in a chherhriam a ni a. Hetianga saptawng ngeia lehkhabu a ziak hi a chhuanawm hle a ni," a ti bawk.