Aizawl: MJA President Zonunsanga Khiangte chuan nimin chawhnu dar 1:00 khan Aizawl Press Club-ah RNFI Services Private Limited te siam, khawl te hmanga pawisa lakchhuahna 'Mini ATM' a tlangzarh.

Mini ATM tlangzarh inkhawm hi Vanlalrema Vantawl, Ex President MJA chuan a kaihruai a, thu sawiin MJA President chuan, "Intlar ngai loa pawi -sa lakchhuah theihna awm chu a tangkai a rinawma, a bik takin Bank awmlohna hmuna awm thingtlang lam ten an chhawr tangkai lehzual dawn a, chuvangin khaw tam zawkah awm thei se a duhawm hle a ni," a ti. MJA President chuan thla tawp leh thla tharah te ATM ah intlar an tam thin avangin hmanhmawh tan thil tih a buaithlak thin hle tih sawiin, "Mini ATM hi mipui rawngbawlna tangkai tak tur a ni," a ti bawk.

Mipui ten awlsam zawka pawisa an lakchhuah theihna tur Mini ATM (mobile phone tiat lek) hi ‘RNFI Services Private Limited’ chuan an duang chhuak a. Mizoram-ah pawh nikum kum tawp lam khan lakluh niin, Mizoram-a Star Distributor (SD) chu Sellai Agency, Petros Building 4th Floor, H.No. A-104, Kaisara Road, Tuikual South, Aizawl - 796001 an ni.

Mini ATM hi India ram hmun tam takah hman a ni tawh a, recognised retailer hnenah ATM card (debit card) kha hrut (swipe) in chumi hnuah ATM pin number kha chhutluh tur a ni a, pawisa lak chhuah duh zat chu retailer-in a pawisa atangin a pe mai dawn a. ATM booth-a pawisa lak ang thovin, pawisa lak chhuah rualin mobile number ah SMS a thleng nghal dawn a ni.

Mini ATM ah hian Aadhar card leh ATM card hmangin pawisa lakchhuah theih a ni a, ATM card hmangin Rs.200 chin chunglam lakchhuah theih a ni a, Aadhar card hmangin Rs. 100 chin lakchhuah theih a ni bawk.