ZALEN December 13, 2023 : MNF chuan Pathian leh Mipuite duhdan angin Sawrkar thar ZPM kaihhruai alo piang ta a. sawrkar hmasain theih tawp alo chhuahpui tawh angin kan unau raltlante tan theih tawp chhuah chhunzawm turin, ZPM sawrkar chu an ngenin an chah.

MNF chuan, "An duh reng vang ni hauh lovin, kan unau Myanmar, Bangladesh leh Manipura chengte chuan harsatna namen lo tawkin, an chenna hmunah tihduhdah, nghaisak leh thah an tawk a. An nunna humhim turin Zofate Jerusalem Mizoram an rawn pan a ni. Myanmar leh Bangladesh atanga rawn tlanlutte phei chu thawn let turin India sawrkarin na takin Mizoram Sawrkar rawn nawr mah se, kan unau, kan thisen zawmpuite chu 'dam leh tlang khatah, thih leh ruam khatah' tiin MNF kaihhruai sawrkar khan a lo hum a. Mipuite nen tangkawpin ei leh in, chenna leh thuamhnaw bakah zirna thlengin a pe a. An tan huaisen takin a ding tlang a ni," an ti.

"Mizo hnamin a mawhphurhna tlansan lova, a dingnghet tlat angin, kan unaute hi an chenna hmun ralmuang a nih a, zalen taka nun an hman leh theih hma chu thlamuang taka Mizorama an awmzui zelna turin Mizoram Sawrkar, ZPM kaihhruai chu ding chhunzawm zel tur leh nghei lova, an mamawh angte pe chhunzawm zel turin a chah a. Zohnam inpumkhatna kawnga huaisen taka Pa chan changa a din chhunzawm zel a beisei a ni," an ti bawk.