Aizawl June 17, 2023 : Zoram Peoples Movement Zonu te chuan MNF leh Congress te chu hmeichhiate hamthatna tur ngaihtuah tawk lovah an puh.

Vawiin khan Aizawl Press Club-ah thuthar lakhawmtute kawmin ZPM Zonu pawl chuan Mizorama sawrkarna lo chelh tawhtu party pahnihte chu hmeichhiate ngaihthahah puhin an hamthatna tur sum tam tak pawh tiluangralah an puh.

ZPM Zonu General Secretary Lalnunsangi chuan, “Hmeichhiate hamthatna turin nikum financial year khan SRLM hnuaiah annual action plan atan vaibelchha 174.13 approved a ni a, nimahsela Mizoram sawrkarin 1st installment vaibelchhe 39.18 chiah a hmang a. Heta lang chiang reng chu Self Help Group hmasawnna atn sum tam tak awm hi hman lohin a luangral thin tihna a ni,” a ti.

MzSRLM-a staff awm tlem chu an ngaimawh hle tih sawiin staff awm tur zat 469 atangin 271 chauh an awm tih an sawi a. “SHG enkawltu tur staff kan nei mumal leh si lo hi MNF sawrkar hnuaia hmeichhiate hmasawnna tur rahbehna lian takah kan ngai a ni,” an ti a. SHG chungchanga MNF sawrkar thiltih dan chu hmeichhiate hmuhsitna leh rahbehna nia sawiin naktuk Thawhtanni hian an lungawiloh lantirnan RD Minister Lalruatkima hnenah lehkha thehluh an tum tih an sawi bawk.