Aizawl May 10, 2024 : Vawiin khan Mizo Hnam Run-ah chhung inkhawm neih a ni a. Hun hnihna, Political Session ah MNF Gen. Hqrs-a PAC a ruat thar Ramthanmawia, MLA chuan Sawrkar khalh ngilna kawngah mipuiten thurawn min pe zel turin a ngen.

Papuia chuan, "Tuna MNF MLA 10 te hi a thiam ber ber te, a fel leh fing berte kan ni hauh lo. Pathian leh Kan ram tan mahni pawh inchhi ral raih turin kan inhuam a, eptu dinhmuna kan mawhphurhna te pawh theihtawp chhuaha tihhlawntlin kan tum dawn a ni. Sawrkar khalh ngilna kawngah mipuiten thurawn min pe zel turin ka ngen a ni," a ti.

East Tuipui bialtu chuan, Hotute remruatna anga PAC a ruat thar a ni chu a beisei loh leh hetiang dinhmunah ruat lo mah se, a lawm tho tur thu sawiin midangte hnem tura awm mai a duh zawk thu a sawi. "Hruaitu thar nen bul kan tan tha dawn a. Party-in kan tihsual tam tak a awm ang, kan tihfuh loh te siam thain theihtawpin hma kan la chho zel dawn a. Pathian hruaina zarah kan sawrkar leh ngei ang," a ti.

Papuia chuan, "Sawrkar kal tawh - MNF leh Congress te kha Thla 4/5 ah sawisel an hlawh ngai lo. Mahse, ZPM sorkarah hian an hotupain thudik hlel deuh a sawi fo avangin mipuiten thudik an hriat theih nan MNF MLA ten mipui hriatah thudik kan puanzar a ngai leh thin. ZPM hi beih an ngai hran lo, pawl hrang hrang kalkhawm an ni a, an pheikhai a rual hran lo," a ti bawk.