ZALEN May 9, 2025 : MNF President Zoramthanga chuan Vawiin hian Mizoram chhim lam a fan chu chhunzawmin, Lawngtlai Mizo Hnam Run leh Siaha Mizo Hnam Run a tlawh a. Thusawina hun a hmang ve ve a, sawrkar leh tura mipui beisei an nih thu a sawi.

Zoramthanga chuan thu sawiin, "Mizoramah Political Party 30 aṭanga 40 inkar a piang tawh a. Tam tak an ral tawh a. PC an ral, Congress lah an chak lo telh telh a. Tunah chuan a Party lian pahnih chu MNF leh ZPM kan awm ta a ni. Indo, underground politics leh thil hrang hrang MNF hian a paltlang nasa lutuk. Chuti chung chuan MNF chu Mizorama party ruhrel lian ber kan la ni mek. Sawrkar leh tura mipui beisei kan ni leh mek a. Hei hi a chhan chu Pathian leh kan ram tan, tih thuthlunga kan din tlat vang a ni," a ti a. "Kum 64-a upa MNF hi Pathian leh kan ram tan, tia Pathian hming kan lam tlatna hi kan felnaah Pathianin min ruat sak a ni," a ti.

MNF President chuan,"Mizoram leh a mipuite Pathian chanchintha hril darh tura buatsaih hi MNF thil tum a ni a, chu chu MNF foundation a ni. MNF hi kan tlak chhiat lai a awm a, kan hniam em em lai a awm a. Mahse, Pathian thuthlung kan vawn tlat avangin Pathianin kan hniam hlen a phal ngai lo a, a lo vul thar leh thin. Pathian leh kan ram tan kan bei zel ang," a ti bawk.

Rama chuan, "Pathianin MNF hmelmate a sut tluk sak dan chu MNF chakna hmangin a ni ngai lo. A chawi sang te te a, an tlachhe leh mai thin. PC leh Congress te a'n lal tir tak tak mai chu lal chiang tak an ni. ZPM pawh hi mipuite min hriat chian tir theih nan a lal tir zet a. Mipuiten kan hrechiang ta mek a. Engmah an lo ni lo tih a lang mek a, a ni telin an hniam raih raih a. An sawrkar leh ang em, tih lam a ni lo, tun term hi an daih ang em, tih chu mipui zawhna a ni tawh a ni," a ti.

Zorama chuan, "Pathian leh mipui zarah MNF kan sawrkar leh chuan District Council-a MDC te duh duha an pakai thei danna hi Parlialment-a pass tir turin theih tawp kan chhuah dawn a ni," a ti bawk.