Aizawl August 29, 2022 : Vawiin khan PC Party Office Bearer te chuan meetiing an party office-ah an nei a, he hunah hian Sr. Vice president Vanlalruata chuan, MNF chu sum enkawl thiam lo leh Zoram sawp chhetu-ah a chhal a, hnawl an ngai tawh, a ti. 

PC Party Sr. Vice President chuan, "Kan ram dinhmun hi ngun taka kan ngaihtuah chuan tuna kan sawrkarna chelh mek tu MNF sawrkar hian sum enkawl a thiam loh avangin Mizoram hi retheihna bawihah kan pil thuk ta hle mai a. A bikin ni tin eichawp zawngte retheihna leh pachhiatna a belhchhah nasa hle tawh a. Kan ram sawp chhe mektu MNF sawrkar hi Zoram mipuiin kan hnawl a ngai tawh a ni," a ti.

Vanlalruata chuan, ''Nakum 2023 MLA inthlanpui lo awm turah hian PC Party sukthlekna lam lamin sawrkarna an siam dawn avangin PC Party hi sawrkarna fawng chelhtute zinga pawimawh ber a ni dawn. PC Headquarters hruaituten sawrkar thar siam tura kan hma lakna hi hmun tina PC Party miten kan hriat a, tan kan lo lak ka duh a ni," a ti.