ZALEN April 29, 2025 : Nizan khan MNF Thalai, MNYF te chuan Edenthar-ah truck pakhat atangin Kuhva ro bag 200 phur chu nang chingin an din tir a, Bawngkawn Police Station-ah FIR an thehlut.

MNYF Aizawl East-I hruaitute chuan Zemabawk dai-ah truck pahnih ten Kuhva ro an inhlanchhawn a awm tih thu an dawn atangin hma an la a, an thil phur an inhlanchhawna hmun an va thlen hian an lo awm tawh lo a, an thudawn bawhzuiin Kuhva ro phurtu hi an um zui a, Edenthar Veng-ah hian an nangching ta tih ZALEN an hrilh.

Truck an man hi Assam registration AS-01 FC 7975 a ni a, a khalhtu hi Sultan Ahmed s/o Haminder Rehman, Borenga, Cachar district mi niin, Kuhva ro neitu hi Saphmingthangi d/o Vanlalpeka, Falkland, Aizawl nia chhal a ni thu MNYF atanga thudawnna chuan a sawi.

MNF Thalaite chuan he an Kuhva ro man hi an MLA leh an president Robert Romawia Royte leh Tuirial bialtu MLA Laldawngliana hovin hma an la tih an sawi bawk.