ZALEN April 10, 2025 : MNF Vice President Lalchhandama Ralte, MLA chuan, "MNF political goal diktak chu, Zofate tana zalenna famkim neih hi a ni a. Hei hi Pu Laldenga hova MNF din tirh a ta a la danglam ngai lo. MNF chuan zalenna famkim hi kan la neih ngei kan ring a, kan beisei tlat bawk a ni. Chuvangin, Ex. MNA te hi MNF neitu, khawvel hriata Zofate min phochhuaktute in ni a. Kan hnam rohlute in ni a, mual in liam zel avangin inrem leh lungrual takin awm zel ang u," a ti.

Vawiin khan Archives Hall-ah Ex. Mizo National Army Assiociation General Assembly Vawi 13-na hun hman a ni a, He hun hmanpuitu Leader of Opposition Lalchhandama Ralte chuan, "Ngaihdan inanlohna leh engemaw avangin hnam pasalthate chu political platform leh pawl dangah te an awm hrang mek a. Ram leh hnam tana thi, thi ngam an ni a. Chuvangin, hnam pasalthate in pianna MNF-ah lo kir leh vek turin ka sawmin ka ngen a che u. Mi thenkhatten zalenna sualtute leh hotute sawinep zawng leh chirhtheh zawnga thu leh hla an nei thin hi a pawi takzet a ni," a ti.

"British laka zalenna sualtute kha ziaktu thenkhat ten, 'Sepoy Mutiny' tiin an sawi thin a. Hei hi tunhnuah a dik loh zia hriain, zalenna sualtu pasaltha tia koh an ni leh ta zawk a ni. Chuvangin, hnam pasalthate kha he hnam leh ram tan hian an hlu takzet a ni," a ti bawk.

He hunah hian martar te sunna hun leh 2025 Local Council tling tharte chawimawina hun hman a ni a. Resolution pali(4) passed a ni bawk. Hun hnihnaah, MNYF Hqrs hruaitute kaihhruaiin, kum 2025-2028 hruaitu thlanna hun an hmang bawk.