ZALEN September 18, 2023 : MNF Thalai chuan Zoram zalenna suala nunna hlantu, hnam pasalthate hriatrengna ‘Martar Day’ vawi 42-na September ni 20, 2023 a lo thleng tur pualin Mizo National Youth Front (MNYF) Headquarters’ chuan Two wheeler hmangin ‘Mizo Nationalism Rally’ naktuk September 19, 2023 hian a buatsaih dawn.

MNYF Vice President Zodinpuia, "He hunah hian Zoram zalenna tura nunna hlantu; kan hnam pasaltha ‘Martar’ ngaihlutu zawng zawngte leh Mizo hnam hmangaihtute lo tel vek turin thinlung takin a sawm a ni," an ti.

Hun an hman tur chungchang sawiin MNF Thalai Vice President chuan, "Mizo thalaite zingah hnam hmangaihna rilru (Mizo Nationalism) nasa taka a indinthar chho leh ta hi Mizo National Youth Front (MNYF) Headquarters chuan lawmawm a ti hle a, Mizote hnamdang lak atanga chimral a kan awm mai lohna tur leh, hnam anga kan dam khawchhuah theihna tur hi MNF chuan a thlir ber a nih avangin hnam hmangaihna (Mizo Nationalism) thinlung nei tura nasa taka kan inzirtir chhohzel hi tul a ni," a ti.

Mizo Nationalism Rally hi chhun dar 12 ah AMC Office bul, Thuampui veng atangin MNYF President Dr. L Thangmawia, MLA chuan a flag off ang a, hun kharna inkhawm hi chawhnu dar 2 ah Vanapa Hall-kawt a neih tur a ni. Zoram in zalenna a sual lai a Army Chief Tawnluia, Deputy Chief Minister chuan hun a hmang ang. 

MNF Thalai chuan he hunah hian Mizoram Independence Movement hriat thar lehna a nih an beisei a; MNYF Headquarters chuan Mizoram in zalenna a sual lai a Hnam puanzar (Mizoram Flag) a pho lang dawn bawk a ni. 

September ni 28, 2023 hian Mizoram pum huap MNF thalai intawhkhawm, 'MNYF Workers Meet' Vanapa Hall, Aizawl ah neih tur a ni a, Mizoram puma MNF thalai zawng zawngte he huna rawn tel vek tur hian an in sawm a, hemi ni hian MNYF Headquarters'-in intihsiakna chi hrang hrang a siamte lawmman a sem nghal a ni dawn a ni.