Modi-a cabinet zinga 42%-ten thubuai nei

Admin - Jul 11, 2021

Minister thubuai nei zinga pali phei chu thubuai khirh tak, mi thah tumna thubuai an nei tel

Prime Minister Narendra Modi-a cabinet chu kar tir lam khan tihlen niin minister 78 zetan awm ta a. Heng zinga 42% chuan thubuai (criminal case) an nei.

Association for Democratic Reforms (ADR)-in a chhinchhiah dan chuan minister thubuai nei zinga pali phei chu thubuai khirh tak, mi thah tumna thubuai an nei tel tih a tar lang.

Prime Minister Modi-a kaihhruaina hnuaia minister tharte hi Nilaini zan khan lak luh an ni a. Minister 15 zet cabinet-a lak luh niin mi 28 chu minister of state nihna pek thar an ni.

Lok Sabha 17-na kal meka union council of ministers tihlen hnuah hian ADR chuan minister-ten inthlan an chuh dawna affidavit an thehluh atanga chhuiin, minister 33 (42%) chuan thubuai an nei.

Minister 24 (31%) chu thubuai khirh ‘serious’ tak neiin heng zingah hian tual thahna, mi thah tumna leh mi rawk thubuaite a tel.

ADR hi poll rights group niin inthlan hma pawhin a chuhtute dinhmun hi an lo tichhuak tawh thin a. An dum neih dan, thubuai an neih dan leh politics khawvela an hnuhmate an pho lang thin.

Union cabinet-a tel 90% (minister 70) chu millionaire an ni a, an thil neih hlut zawng chu Rs. maktaduai 10 chuang tihna a ni.

Minister pali - Jyotiraditya Scindia (Rs, vaibelchhe 379 chuang), Piyush Goyal (Rs. vaibelchhe 95), Narayan Rane (Rs. vaibelchhe 87) leh Rajeev Chandrasekhar (Rs. vaibelchhe 64) te chu hausa ber ber, Rs. vaibelchhe 50 chuang neite an ni.

Minister-te hian chawhrualin Rs. vaibelchhe 16.24 zel nei ang an ni a. Cabinet minister zingah chuan Tripura MP Pratima Bhoumik chu rethei berin Rs. nuai ruk chauh nei angin a intar lang.

Ani dawtah hian West Bengal atangin John Barla (Rs. nuai 14), Rajasthan atangin Kailash Choudhary (Rs. nuai 24 chuang), Odisha atangin Bishweswar Tudu (Rs. nuai 27 chuang) leh Maharashtra atangin V Muraleedharan (Rs. nuai 27) chuangte chu a rethei zual an ni.

Share now